Comite Olimpico Aruba a tene un ceremonia di despedida pe delegacion Arubano cu lo ta representando e isla na e di 2 edicion di e Weganan Sur Americano Hubenil Santiago 2017. E atletanan ta preparando nan mes den nan deporte pa hopi aña y despues di basta luna di preparacion pe weganan specifico aki ta conta cu 11 atleta masculino y femenino competiendo den 6 diferente deporte.
A scoge e deportenan di table tennis, tennis, landamento, triatlon, taekwondo y judo, pero a cuminsa cu 9 deporte y 55 atleta, asina Secretaria General di COA Nicole Hoevertsz a duna di conoce. E grupo cada biaha a bira mas chikito y finalmente directiva di COA a duna aprobacion pe 11 atletanan. E persona cu nan a eligi como e abanderado, esey ta significa e persona cu ta carga e bandera di Aruba den e ceremonia ta e atleta di taekwondo Chiara Petrocchi. “E ta un posicion di honor, pasobra e ta e persona cu ta responsabel pe bandera di Aruba”, Nicole Hoevertsz a expresa. Chiara Petrocchi lo ta e prome atleta cu lo haci su entrada den stadion na Chile y sigui pe demas delegacion.
E proceso largo di preparacion pe Delegacion Arubano bay competi na Weganan Sur Americano a termina, di cual Kamilah Dammers, hefe di mision di Delegacion Arubano ta 4 luna caba ta den e funcion. E preparacionnan a tuma basta tempo di Kamilah Dammers y el a presenta tur informacion na mayornan pa asina nan sa cu nan yiunan ta den bon man. Tur cos ta aregla y tur cos lo cana nechi asina cu nan yega Chile. E atletanan lo biaha dia 28 di september y ta regresa bek dia 9 di october, unda cu nan lo ta kedando 12 dia na Chile. Tin deportistanan ta biahando for di Merca y otro ta di Aruba.
E pre seleccion tabata 55, despues a baha esaki na 33 y despues di reunion critico y presentacion di e comision tecnico a baha e cantidad na 11 atleta. E comision tecnico tin e confiansa cu e 11 atletanan aki ta esunnan miho di Aruba y lo duna un bon presentacion. E Delegacion Arubano lo ta competiendo den 6 deporte, cu ta table tennis, tennis, landamento, triatlon, taekwondo y judo.
Atleta Chiara Petrocchi ta practica e deporte di taekwondo y e lo ta e abanderado di Aruba durante e apertura. E preparacion di Chiara Petrocchi pa Weganan Sur Americano Hubenil Santiago 2017 a bay bon, pero el a bay competi na Costa Rica y tambe el a bay un camp pa 1 luna na Colombia. Durante su ultimo competencia na Costa Rica el a lesiona, pero a percura pa traha riba esaki y tur dia e tabata bay terapia. “Mi tabata haya terapia cerca Steven y el a yuda mi”, Chiara Petrocchi a expresa. E ta sinti su mes cla pa competi na Chile.
E ta hopi orguyoso pa ta e abanderado y ta un honor pa Chiara Petrocchi carga na e weganan e bandera di su isla Aruba. Esaki ta nan prome wega y e ta sinti su mes nervioso. “Mi ta sinti hopi great cu mi ta bayendo e weganan aki, mi a dedica mi bida na esaki”, Chiara Petrocchi a expresa. E ta sinti su mes cla y cu e merece di bay representa Aruba. Desde edad chikito el a cuminsa haci taekwondo y ta dedica na esaki. E experiencia aki ta esun di mas grandi cu e lo haya.
