Aruba Domino Bond recientemente a biaha pa Orlando Florida cu un delegacion di 21 atleta pa asina participa na e di 17 Campeonato Mundial di Domino, organisa pa FID (Federacion Internacional di Domino).
Ta for di 2015 cu oficialmente Aruba Domino Bond a uni na e magno evento aki, cu ta conta cu participacion di diferente pais, manera Russia, Spaña, USA, Barbados, Colombia, Panama, Puerto Rico, Abkhazia, Cuba, Egypto y mucho mas.
E aña aki, Aruba Domino Bond a prepara cu hopi dedicacion y a logra participa cu 21 atleta den e deporte magno di domino.
Tur participante a participa den 2 categoria, cu ta team di 4 como tambe individual.
Durante 4 dia intenso di bataya y concentracion, cada un di e 21 atletanan a hunga mas cu 10 ora pa dia, pa asina representa nos Aruba debidamente.
Resultadonan a varia, pero Aruba Domino Bond por wak atras na un participacion exitoso.
Mester menciona cu tin varios atleta a destaca individualmente, manera Rookie Yabib Franken, como tambe Sunju Ramchandani, a demostra bon domino den e modalidad di Team.
Aruba a logra bay cu premio individual caminda atleta Robert Tromp, a destaca y a keda premia na di 12 luga den ranking mundial di Domino.
Aruba Domino Bond ta orguyoso di por a participa na dicho torneo y ya caba ta den preparacion pa e siguiente mundial 2021 cu lo ta na Panama.
ADB ta felicita tur atleta cu a participa y tambe gradici tur sponsor como tambe subsidie comissie y Minister di Deporte pa por a contribui na dicho Campeonato mundial.
