E siman aki Good4theNeighborhood 2018 (G4N) di Aruba Bank, su di nuebe (9) edicion, a yega su final. Durante 3 siman largo e participantenan a ricibi diferente tayer, presentacion, cursonan y guia manera mercadeo, brinda miho servicio na cliente y hopi mas. Aruba Bank ta orguyoso cu un biaha mas e G4N a termina den gran forma, cu un total di cincuenta (50) hobennan miho prepara y inspira pa maneha nan propio negoshi.
E ultimo siman e participantenan tabata hopi entusiasma pa mustra kico tur nan a siña durante e 3 siman di G4N 2018 di Aruba Bank. Diasabra e participantenan a presenta nan producto final di propio creacion na comunidad di Aruba.
Despues di un debate entre e huradonan, e team di hoben di e grupo Ceana, cu nan producto di body scrub, lip balm y habon organico, a resulta e ganadonan di G4N 2018 di Aruba Bank. Cada un participante di e grupo a gana un laptop. Cada team a mustra nan creatividad y kico tur nan a siña pa asian nan presenta un producto final cu por a bende. E team Sunshine Jewelery a keda na di dos luga cu nan producto handmade bracelets, earrings, necklaces and flower crowns, mientras e team ganado di Social Media tabata Crathings cu nan creacion di stoelnan “customized” di materialnan recicla.
Aruba Bank ta sumamente orguyoso di a mira con e hobennan a crece den 3 siman cu e guia ricibi y a sa di presenta esaki den gran forma.
Aruba Bank ta gradici tur participante, tur cu a duna curso y/ of les y sin lubida e huradonan Kawish Missier (Top Drive), Calvin Maduro (UR Designs/Aruba Rocks), Bryan Nemecek, Johan Spronk y Tanisha Hodgson (My Computer), kendenan tabatin un trabou dificil pa scoge e miho team. Tambe ta gradici famianan cu a sostene e participantenan y tur cu a yuda haci e G4N un biaha mas posibel y exitoso. Aruba Bank ta gradici E.E. Ventures, JZ Marketing & Communications, Edward Erasmus, Elite Productions, The Mancave Barbershop, Aruba Aloe, Kamer van Koophandel, ARC Digital, Omar El Hage, Jurney Tromp pa nan presentacionnan y Voluntario di Corporate Banking & Marketing di Aruba Bank. Durante 3 siman largo e participantenan a ricibi presentacionnan y yudansa for di e colaboradonan pa “shape” e hobennan y por ultimo realisa productonan pa presenta na comunidad di Aruba.
Pabien na e ganadonan pero tambe na tur cu a participa den e Good4theNeighborhood 2018.
