Den fin di siman a tuma luga un evento internacional di bodybuilding. Despues di hopi tempo, Aruba un biaha mas tabata anfitrion. Por mira bek riba un evento exitoso y bon bishita. A evento a inicia cu un asamblea y siminario di hurado. Giovanni Arendsz ta president di Aruba Bodybuilding & Powerlifting Association, durante un entrevista cu 24ora.com el a conta cu e evento a conta cu riba 260 participante y como binti mas cu ta participa den e evento aki.
Cos tabata slow despues di e pandemia pero ora e mundo di bodybuilding a nota cu Aruba lo organis’e, mesora a book ticket y bula pa Aruba. E atletanan ta na altura cu Aruba ta organisa un bon campeonato.Riba e di dos dia tambe tabatin un seccion di ‘fitness chalange’ den e parkeerplaats di Aruba Marriott Resort & Stellaris Casino. E campeonato a conta cu participacion di no solamente hende homber pero tambe hende muhe.
Locual ta haci Aruba asina atractivo ora di organisa tipo di evento asina, ta e neutralidad. A conta cu diesun miembro di hurado, entre nan; di Jamaica, Spaña, Mexico, Antigua, St. Maarten, Aruba y algun pais mas. Por a mira e evento como un celebracion hasta, mirando cu ta den cuadro di e 50 aniversario di e organisacion cu a organis’e. Na aña 2005 a organisa e evento aki na Aruba sigui pa 2010 y diestres aña despues, un biaha mas ta nos turno. Otro aña e evento lo tuma luga na Guyana. Lo tin cambio den directiva. Arendsz, lo bandona su funcion actual pero lo fungi como vice-presidente di e federacion internacional, caminda e lo ta tur caminda, rond mundo yudando y hiba e deporte aki padilanti. Tipo di evento asina ta yuda economia di Aruba. Ora mas tin como 260 atleta ta participa den evento asina, tur ta bin cu nan famia, coach, staff y e huradonan. Tur ta keda den hotel, ta come na restaurant, ta haci uzo di taxi y den e proceso ta yuda ta disfruta di un vakantie chikito tambe.
