Conclusion y resultado di tres luna di campaña a bira conoci awe marduga, pero por a ripar’e di trempan caba. MEP a haya 9 asiento, AVP a baha na 7 asiento, MAS a logra 2 asiento, RAIZ a bay na 2 asiento y Accion 21 a sali cu 1 asiento. Na tur tabatin 5 restzetel den e eleccion aki. E partidonan tradicional y mas grandi a conoce un reduccion substancial den e cantidad di voto total; evidencia cu e votonan aki a bay pa e partidonan mas chikito y nobo. Partido MEP a cay di 22078 voto na 2017 pa 20701 voto awe. Partido AVP a cay di 23385 voto na 2017 pa 18348 voto awe. MEP a mantene e mesun asientonan, pues 7 asiento y 2 asiento di restzetel. AVP a baha di 8 asiento y 1 restzetel pa 6 asiento y 1 restzetel.
E partidonan cu ta bandona Parlamento ta RED y POR. Otro partidonan cu a competi y no a alcansa un asiento ta HTC, UPP, Curpa, Pueblo Prome y PPA. Lider di AVP a hiba palabra bisando cu tabata un campaña dificil, pero cu a traha duro y lo sigui traha duro pa wak den ki forma partido AVP por duna su aporte na e rescate di Aruba. Eman a felicita e partidonan nobo cu a obtene asiento den parlamento. Awo su responsabilidad ta pa haci di AVP e partido mas grandi di Aruba bek
“MEP ta cla y dispuesto pa forma e proximo coalicion”, esey tabata e palabranan di lider Evelyn Wever-Croes. ‘Nos ta cla pa Gabinete Wever-Croes II.” Su mision pa un proximo gobernacion ta pa Aruba por para bek riba su propio forsa.
Di e banda positivo comunidad a comporta di un manera di elogia. No a registra ningun incidente di violencia of accidente di trafico grave. Vocero di Cuerpo Policial Aruba a calific’e como un di e eleccionnan mas trankil den historia di nos pais.
Un conclusion inicial ta cu yabi di e proximo coalicion di gobierno ta den man di e partidonan Accion 21, MAS y RAIZ.
