Dia 29 di juli 2021 a tuma luga na Aruba den Cas di Cultura final di e competencia literario Arte di Palabra, cu participacion di hoben di Aruba, Boneiro y Corsou. Fundacion Lanta Papiamento (FLP) tabata presente y a keda encanta, un biaha mas.
Tabata un fiesta di berdad cu a pone enfoke riba Papiamento su rikesa y bunitesa cultural y riba e creatividad y dominio di idioma Papiamento di nos hobennan.
E anochi tabata cuadra exactamente cu e meta di e evento cultural aki:
Promove amor pa cultura di nos idioma Papiamento.
Enrikece nos idioma cu creatividad di nos hubentud.
Den sala tabata reina un entusiasmo y alegria y e hobennan a mustra aprecio pa cada un di e participantenan. Tur participante tabata haya un ovacion cu hasta pitamento cu ‘vuvuzela’. UNION ta e palabra cu ta caracterisa e evento aki, union cultural y social entre Aruba, Corsou y Boneiro. Arte di Palabra den tur sentido di palabra ta un celebracion di Papiamento, e idioma unificado di e islanan aki.
Masha pabien na e hobennan participante, na nan docentenan y na e organisadonan!
Historia cortico
Arte di Palabra ta existi for di aña 2000. Señora Ange Jessurun cu tabata consulent di Papiamento e tempo ey, a cuminsa cu e evento aki na Corsou, pa celebra e hecho cu Papiamento a drenta enseñansa avansa como materia obligatorio den e aña escolar 1998-1999. Boneiro a cuminsa participa na 2006 y Aruba na 2009. E competencia a cuminsa pa e alumnonan di klas 1 y 2 di enseñansa avansa y e entusiasmo tabata di tal forma cu awor tur klas di tur scol avansa por participa cu poesia y cuenta cortico original of existente y haiku. Adulto tambe por participa den e competencia di haiku.
Cada isla, Aruba, Corsou y Boneiro, ta saca su ganadonan y cada aña e final ABC ta na un di e islanan aki. Prins Bernard Cultuurfonds Caribisch Gebied ta yuda den financiamento di biahe y estadia.
Durante cada evento final ta honra algun baluarte cultural di Aruba, Corsou y Boneiro cu Tapushi Literario.
Y importante pa menciona, ta e publicacionnan cu Arte di Palabra a produci caba:
Pòtpurí Arte di Palabra 2009, cu e miho obranan di 2000-2008;
Pòtpurí Arte di Palabra 2014, cu e miho obranan di 2009-2013;
Pòtpurí Arte di Palabra 2019, cu e miho obranan di 2014-2018.
Por bisa cu e coleccionnan aki ta bon material literario pa cualkier lesado y bon material cu por uza den scol.
Fundacion Lanta Papiamento ta spera cu e evento cultural valioso aki, Arte di Palabra, lo tin masha hopi edicion mas y lo sigui crece. Cu e colaboracion ehemplar cu ta existi entre e instancianan cultural y di enseñansa di Corsou, Aruba y Boneiro, no tin duda den esey. Den un siguiente articulo FLP ta pone enfasis riba e importancia specifico di Arte di Palabra.
