Diarason dia 22 di Mei pa 6.30 di atardi a tuma lugar e aperture di e exposicion “Lasonan Caribeño Aruba” na Museo Arqueologico den un ambiento ameno, cu presencia di Su Excellencia Gobernador di Aruba, sr. A. Boekhoudt, Minister A. Bikker cu a representa Minister di Cultura, Minister R. Lampe y parlamentarionan presente. Publico presente tabata hopi entusiasma y curioso pa mira e exposicion internacional aki.
Despues di a haya un splicacion breve di e projecto NEXUS1492 y di e projecto Caribbean Ties pa dr. professor Hofman y projectlider general di Caribbean Ties, Tibisay Santkatsing, por a admira e exposicon mientras cu tabata pasando un documentario di e projecto. Lider di e projecto “Lasonan Caribeño Aruba”, Suzy Boekhoudt a gradici pa e oportunidad unico y e confiansa haya di NEXUS1492 pa traha den e projecto international aki y pa por a lidera e projecto aki pa Aruba. Representantenan di e comunidad Wayuu biba na Aruba a efectua un ceremonia di apertura mistico y como parti di e ceremonia, Gobernador di Aruba tabata e prome invitado pa bishita e exposicion ‘Caribbean Ties’ y a haya un guia di e projectliedernan di NEXUS1492 y Caribbean Ties.
E projecto di investigacion di NEXUS1492 a dura pa mas cu 5 anja y a traha hunto cu partnernan local den region di Caribe y partnernan na Hulanda pa mas o menos 2 aña pa e exposicion’ Lasonan Caribeño, antes y awor’ por a ser realisa. E exposicion a ser traduci den Spaño, Frances, Papiamento, lenga crioyo di Guadeloupe, Hulandes y Ingles y ta habri un tras di otro den luna di Mei y comienso di Juni, den 12 isla den region di Caribe, como tambe na Hulanda.
E proyecto di investigacion NEXUS1492 ta investiga consecuencia di e encuentronan di e prome habitantenan di Caribe cu e colonisadonan. E exposicion “Caribbean Ties Aruba” ta habri pa publico cu orario special di Diamars te cu Diabierna entre 10’or di mainta pa 4’or di merdia na Museo Arqueologico. Gruponan, manera scol of camps cu desea bishita e exposicion, por tuma contacto cu e Departamento Educativo di Museo Arqueologico na tel. 582-8979, pa traha afspraak pa guia y programa educativo.
Alavez, Museo Arqueologico tin un programa publico planea en conexion cu e exposicion Caribbean Ties. Diarason dia 29 di Mei, un siman despues di apertura di “Caribbean Ties”, Ryan Oduber y partners lo presenta un anochi interesante di e projecto Anthropical, den e area di ex-fruteria na Museo Arqueologico, cu lo cuminsa pa 7.30’or di anochi. E anochi aki lo tin e oportunidad tambe pa bishita e exposicion “Caribbean Ties Aruba”. Pues ta invita un y tur pa bin e anochi interesante aki. Keda pendiente via nos pagina di facebook Archeo Aruba y National Archaeological Museum Aruba pa mas informacion tocante nos actividadnan pa publico.
Un biaha mas Museo Arqueologico ta desea di gradici su partnersnan NEXUS 1492, Fundacion 1403, Ministerio di Cultura pa por a realisa un bunita apertura pa un exposicion international cual a resulta di e colaboracion di diferente partners den e projecto di investigacion sumamente importante den region di Caribe, esta NEXUS 1492.
