Despues di e ceremonia di apertura dialuna, e conferencia di Florida Caribbean Cruise Association(FCCA) a cuminsa oficialmente diamars mainta y a sigui merdia cu diferente evento relata na e mundo di turismo crucero.
E conferencia di FCCA ta un evento di cinco dia diseña pa crea un miho comprension di e forma di traha di e industria crucero y ta yuda e participantenan crea relacionnan comercial. Via di forumnan specialisa cu ta combina reunion- y tayernan cu eventonan social, e participantenan tin un chens unico pa desaroya relacionnan, promove productonan y hiba combersacionnan cu mas di 100 ehecutivonan di FCCA su lineanan crucero, cu ta e grupo cu ta dicidi unda e barconan ta bay y con pa inverti den destinacion y infrastructuranan.
Un delegacion di Aruba consistiendo di representantenan di Aruba Ports Authority N.V. (APA) y Aruba Tourism Authority (ATA) ta participando conhuntamente den e conferencia grandi aki tumando luga na Puerto Rico cu participacion di mas cu 1000 persona di mundo di turismo crucero. E conferencia di FCCA ta esun ideal pa sigui estrecha e lasonan cu socionan crucero y crea conecionnan nobo.
E conferencia internacional aki ta conta cu participacion di companianan manera Carnival Cruise Line; SIlversea Cruises; Royal Caribbean Cruise Ltd; MCS Cruises Ltd; Holland America Group; Virgin Voyages; Disney Cruise Line y Norwegian Cruise Line Holding.
Un parti importante di e eventonan aki ta e oportunidad cu ehecutivonan di turismo di diferente destinacion ta haya pa reuni personalmente cu ehecutivonan crucero. E ta un oportunidad unico pa motibo ta haya mayoria di e ehecutivonan importante di e diferente lineanan crucero presente den e di 26 conferencia anual di FCCA.APA conhuntamente cu ATA sigur ta probecha pa scucha tambe con mas por mehora e producto Aruba y e infrastructura di puerto Oranjestad y alabes presenta e mehoracionnan y proyectonan di embeyecimento cu ta den preparacion / ehecucion.
Participando na tipo di eventonan aki Aruba a logra cu companianan crucero a inclui algun di nan barconan mas grandi riba e bishita pa e isla, aumentando asina di forma gradual e cantidad di pasaheronan crucero cu ta yega Aruba. Asina Aruba a ricibi na 2016 656.043 pasahero crucero den e 307 barconan cu a yega; na 2017 e tabata 352 barco crucero cu a trece 792.403 pasahero y na 2018 el a subi atrobe pa 815.161 pasahero crucero pero den menos barco cu a yega, esta 334. Esaki a logra door cu a haya barco mas grandi. E cifranan di 2019 te cu september ta mustra cu a ricibi 208 barco crucero caba cu a percura pa 555.525 pasaheroy e projection pa e aña aki lo ta cu lo yega rond e cantidad record di aña pasa.Den e cinco dianan cu e conferencia di FCCA na Puerto Rico ta dura, ta confirma rutanan exitoso, ta probecha discuti problemanan den gruponan y cu ehecutivonan di e 18 companianan crucero presente, cu semper tin bon conseho pa nan clientenan.
