Un bunita iniciativa a sali for di empleadonan di APA pa haci muchanan contento den e temporada special aki di fin di aña. Den e iniciativa aki nan a haya cooperacion completo di gerencia di Aruba Ports Authority (APA).
Ta un tradicion cu ta dorna e mata di Pasco na oficina di APA y e aña’ki a surgi e idea cu empleadonan por participa cu e donacion unda cu cada bala di pasco den kerstboom ta costa 25 florin. Esaki ta nifica cu cada bala cu nan pone ta un donacion di 25 florin. Esaki a crea un entusiasmo grandi bou di e empleadonan cu di e forma aki ta haya cu nan ta cumpli cu e espirito di Pasco di regala Kiwanis cu e aña aki a scoge Fundacion Ban uni Man pa Cria nos Muchanan pa nan donacion.
Empleadonan hunto cu gerencia a pone en total 140 bala di decoracion den e kerstboom cual ta encera un suma di 3500 florin. E tabata algo diferente di loke semper ta haci fin di aña pero cu a yena tur esnan cu a participa den un satisfaccion grandi di por haci un grupo di mucha feliz.
E check cu a wordo traha a wordo entrega na e Kiwanis Club cu lo percura, pa agrega esaki na otro fondonan cu nan a recauda, y yega na e suma necesario pa e fundacion.
APA y su empleadonan ta hopi contento di por haci mas cu un mucha feliz den e temporada aki di fin di aña y ta gradici Kiwanis Club pa nan aporte y ayudo den e campaña social aki cu a resulta uno sumamente exitoso.
