Extreme Domino Team tin dos uniform nobo pa competi durante e campeonatonan di domino. Meta di Extreme Domino Team ta pa bira campeon e aña aki, despues di semper cay cortico.
Robert ‘Indio’ Tromp, capitan di Extreme Domino Team, a indica cu mundo di domino ta scondi. Aña pasa el a forma parti di e team, pero e aña aki nan a nombr’e como lider pa yuda nan. Hopi biaha nan a termina como subcampeon, pero ta buscando pa bira campeon. Semper nan tabatin dos sponsor, ATC y Ryan Production, pero awo nan a haya un sponsor nobo cu ta Primavera Club. Segun Tromp, nan ta gradici na e otro dosnan.
Awo nan tin dos uniform pa hunga den. Nan tin un uniform color preto, cu nan ta uza riba diabierna. E otro uniform ta blanco cu ros y nan ta uz’e riba diadomingo. Pa haya sponsor e ta algo dificil pa haya, pasobra tur hende ta mira kico a pasa durante covid. Tromp a indica cu nan ta brasa e sponsor nobo aki manera ta haci cu e otronan dos, caminda nan ta continua di uza un y uza e otro, y tur ta keda contento.
Madrina y padrino di e team esunnan cu awo ta rond Primavera Club. Tromp a gradici Anthony Trimon, kende ta doño di team, pa dun’e e oportunidad pa guia e team. Tambe e ta gradicido na Primavera, ATC y Ryan Production, y tur cu a duna nan Primavera como sede pa nan train.
Anthony Trimon, doño di team, a indica cu diescinco aña pasa su persona hunto c’un primo tabata den un team di bush league, pero nan a dicidi lanta Xtream Domino Team pa join bond unda tin mas regla. E ta corda cu e tempo ey e hungadonan no tabata gusta, pero a convence nan pa siña tur regla. Asina ey a lanta e team, cual antes tabatin e nomber Biba Lekker. Awo nan tin tres sponsor y Trimon ta gradici na nan p’e sosten ricibi.
E ta corda cu nan prome sali nan a gana, pero como doño di team e ta percura pa busca un capitan, busca hungado y asina ey nan crece. Pa basta aña nan ta clasifica entre e miho cuater teamnan den Aruba Domino Bond, pero ainda nan no a logra bira campeon. Hopi bes nan a termina na di tres luga, cuater luga y subcampeon. E campeonato a cuminsa y ya nan ta den lucha cu e meta pa gana e titulo di campeon.
