Tin preocupacion cerca e trahadonan di Excelsior Casino. Tin discusion andando cu sindicato, trahadonan y gerencia di e casino aki. Mediador di gobierno ta envolvi.
Segun Anselmo Pontilius, na momento cu e trahadonan a organisa nan mes, y si por corda algun siman pasa, tabata tin un referendum den cual cu mayoria di trahadonan a scoge pa FTA representa nan, den e reunion aki e trahadonan a expresa nan preocupacion. Nan informacion ta cu e dunador di trabao awor aki, como operador di casino ta termina dia 18 di September. Informacion ta cu e casino ey lo cera pa e dia ey, cu tur consecuencia ya cu e operador a informa cu financieramente nan no tin e forma pa paga e trahadonan nan añanan di servicio, etc. A ripara esaki mesora y a busca e informacion y berdad e operador a wordo confirma cu e tin varios problema.
Esey no kiermen cu e operador no ta trahando. Mientras tanto a sinta siman pasa y tambe e siman aki a sinta un biaha mas cu FTA y cu e abogado di e compania, pa mira prome pa firma un protocol cu ta regla e puntonan specifico, prome cu nan drenta den negociacion mes. E punto principal ta cu a keda confirma, cu e casino, contrario na e pensamento cu e lo cera dia 18 di September, e casino e aña aki no lo cera mas. Esey no ta nifica cu e problema ta resolvi. Pero tin bastante preocupacion riba con lo sigui. Den e reunion cu a tuma luga entre FTA y abogado di e Excelsior Casino, a palabra cu lo bolbe bek den e prome siman di Augustus pa mira si por firma un acuerdo y eyden purba di haya claridad pa futuro di e trahadonan.
E doñonan di e edificio aki y esnan cu tin e licencia pa opera e casino, e grupo aki di Lionstone a informa cu otro aña nan lo kier renoba e casino aki. Consecuentemente pa un periodo no lo tin un casino den operacion. E puntonan aki mester ta trata debidamente, pasobra ta papiando aki di 55 pa 60 trahado y gran mayoria di nan cu un gran cantidad di aña di servicio. E temor ta grandi cu nan por haya nan mes cu problemanan serio, mescos cu ta e caso di Aura Casino, manera cu por a mira un aña, pa un aña y mey pasa.
Garantia
Pontilius a sigui splica cu garantia no tin. Den e caso aki, por lo menos e combersacionnan cu mediador di gobierno a hiba na e momento aki cu e abogado di e compania, cual ta e dunado di trabao y tambe abogadonan di esnan cu tin e licencia, a palabra cu ta trata di tur forma pa preveni loke a pasa den e caso di Aura Casino y den e caso aki, e sugerencia ta tambe cu den caso cu e dunado di trabao no por cumpli cu esnan cu tin e licencia, lo por continua cu e casino aki y preveni loke cu a mira den e caso di Aura Casino.
A reuni cu ken
A reuni den dos parti. A reuni conhuntamente cu e abogado di Excelsior Casino, cual ta e dunado di trabao y na e mesun momento a busca un reunion cu abogadonan di doñonan di e edificio y esun cu tin e licencia di e casino. Den un reunion cu esnan cu ta doño di e edificio y cu tin e licencia na man, a trece bastante trankilidad, cu ta confirma cu e casino su operacion no lo cera awor aki na September.
Inkrimping
E ultimo reunion cu tabata tin cu abogadonan di e compania cu ta doño di e edificio a informa contrario cu Aura Casino, cu nan lo tin un casino, despues cu e renobacion tuma luga, mes of mas grandi. Nan speransa ta cu net contrario, lo mester di e cantidad di hende aki sigur of mas.
E punto principal cu tin awor aki cu tin un dunado di trabao cu yama Excelsior Casino NV y ta bin un discusion pronto, cu esnan cu ta tuma over, y esey ta e debate riba e ley cu ora bo ta tuma over e compania, bo ta tuma e trahadonan, etc. Eynan ta bin un discusion cu si berdaderamente ta yega na un areglo cu ta paga tur hende y ta laga nan cuminsa completamente di nobo of nan lo continua cu nan añanan di servicio, nan condicionnan di trabao, nan salario, manera e ta, etc. Esey ta un punto cu e partidonan tin cu yega na otro. Importante ta awo cu a trece bastante trankilidad cu e casino no lo cera dia 18 di September, manera a wordo informa anteriormente.
