Den Antilliaans Dagblad di diamars, 9 di november 2021, tabatin un articulo cu potret riba pagina 14 riba di un tayer regional riba restauracion di mangel cu a tuma luga na Boneiro. E participantenan Arubiano, cu ta empleado di Fundacion Parke Nacional Aruba (FPNA), a indica cu nan lo bolbe bek cas yena di entusiasmo pa pone den practica e experiencia adkiri y transmiti esaki na nan compañeronan ranger. FPNA, e organisacion di conservacion di naturalesa di Aruba, a ricibi na 2020 e mandato pa maneha e areanan protegi (marino) nobo di Aruba, incluyendo e zona di mangel.
Den e contexto aki, mi ta anima FPNA pa sigui cu nan reforestacion y rehabilitacion di mangel na Aruba, pero mi lo kier duna un les adicional. Na Hulandes tin un dicho cu ta bisa: “Voorkomen is beter dan genezen”. Cu esey mi kier a indica cu si solamente ta enfoca e atencion riba reforestacion y rehabilitacion di e mangelnan, lo sigui “hiba awa lama”, pa uza un otro proverbio.
Al fin y al cabo, si e mangelnan daña, ta corta of mata sin ningun intervencion, reforestacion y e restauracion no lo tin sentido. FPNA tin autoridad pa actua den e zona di e mangelnan protegi contra cortamento, destruccion y e daño riba e especie di mata aki cu tambe ta gosa di un status di proteccion den cuadro di e mangelnan protegi, cu tabata y sigui ta afecta door di e ampliacion di un dump ya satura riba Parkietenbos.
Den e contexto aki, ya a presenta un denuncia na Ministerio Publico p’e delito di destruccion y/of daño di e mangelnan protegi. Sinembargo, ainda no a tuma ningun decision concreto. Cu e maneho di e zona protegi bao di e esfera di influencia di e landfill den Parkietenbos, FPNA por, ademas di pensa riba reforestacion y e replantacion, tuma medida activo contra e invasion aki. Of tin otro rason pa cual esaki no ta sosode y na otro luga, por ehempel na Ocean Villas na Savaneta?
