Opositornan siman pasa a purba di crea un persepcion cu no tin pa combati criminalidad y a cuminsa hunga cu cifra.
Segun minister di husticia, Andin Bikker, tin algun rapport den apenas algun luna, cu nan a logra haya for di algun orde diensten, caminda cu sr. Dowers anteriormente tabata sconde cifra.
Semper ora cu traha un maneho, a base di cifra por analisa y wak si e maneho ta funcionando y ahusta loke ta necesrio.
A base di e cifranan cu tin awor aki, den pasado, na 2016 pa 2017, tabata tin un averahe di 54 atraco y e aña aki a constata siman pasa cu tabata tin 33 atraco te cu 8 di October.
Awor aki, e cifranan no a cambia. Pero e ta basicamente mita di loke tabata den e averahe di 2016/2017.
Fuera di esey a aclarea tambe, a base di cifranan, si wak e porcentahe di atraconan cu a wordo resolvi, na 2016/2017, e averahe tabata rond di 62%.
Diabierna cu a pasa den marduga, a aresta un grupo di atracador, 4 persona en total, cu ta responsabel pa un averahe di entre 5 pa 7 atraco.
Si tabata tin, si sali for di punto di bista di 33/34 atraco, cu tabata tin documenta siman pasa y awor aki a wordo resolvi 5 pa 7 atraco, tin un averahe di direccion di e porcentahe di resolve crimen ta bayendo den direccion di 90%, compara cu e averahe di aña 2016/17, caminda cu sr. Dowers tabata responsabel.
E minister ta agrega cu sr. Dowers tabata bin di Parlamento 2010 te cu 2017, tabata bin cu 6 pa 7 pagina, cu storianan general, pa cual e ta pidi parlamento pa aproba un presupuesto di caso 200 miyon florin y no ta splica kico ta bay haci cu placa.
Si mira su maneho pa combati criminalidad, no ta mira e resultadonan pa esaki.
E gobierno aki a bay parlamento dos biaha, y awo trahando riba presupuesto 2019, cu un plan di maneho den e Memorie van Toelichting, den cual 20 y pico pagina, caminda ta para detayadamente con lo bay preveni y combati criminalidad.
Ora cu mira e cifranan awor aki, si mira un averahe den direccion di mita di e atraconan di aña pasa, di tempo cu Dowers tabata responsabel pa e cartera di Husticia, y si mira con hopi crimennan ta wordo resolvi cu ta den direccion di casi 90%, awor aki tin un maneho amplio.
Pasobra no ta 6 pa 7 pagina mas di un storia general. Sino un maneho di 21 pagina plus, di puntonan concreto. E maneho ey amplio, si wak e cifranan, ta trahando y un cos si e minister ta bisa, cu e no ta satisfecho, pasobra kier baha e indice di criminalidad te cu 0.
Esey ta e esfuerzo cu ta haciendo. Paso pa paso ta bayendo. Si djis constata cu bayendo 10 luna di gobernacion, cuanto informacion a logra haya, ta hopi.
No solamente ta wak kico tabata tin den pasado, sino ta planifica pa futuro. E minister a enfatisa, cu ora e opositornan ta purba di bruha tera pa crea panico, e ta lamenta esaki. Eigenlijk e ta haya cu si bo kier bo pais bon, bo no mester crea panico inecesrio y bo mester wak tambe, refleha kico ta pasando y mira e cifranan.
No solamente tin cifra, pero ta pone nan den contexto tambe. Siman pasa a splica cu a bin ta analisando y cu tin un trend hopi preocupante ta tumando luga.
A analisa cu di e diferente atraconan cu ta tuma luga desde Januari te cu October, tin un grupo basta grandi di persona cu ta ilegal, cu a bin for di Venezuela, cu ta sospechoso den comete e atraconan aki.
Tin un trend caminda cu ta wak cu no solamente e personanan aki ta falta respet na nos leynan di admision y expulsion, pero tambe nan ta bay over na comete atraconan. Den esey, crea un insiguridad pa nos y nos bishitantenan. Esey tambe ta hopi importante y ta subraya e importancia di e decisionnan tuma. Por ehempel cu dia 1 di Juni, a bay over na nombra tur e personanan unifoma di KPA cu nan tambe por controla LTU.
Nan tambe por wak si e status di un persona ta legal of no.
Tambe a intensifica e controlnan di Guarda nos Costa, caminda cu a expulsa caba na Juni y Juli mas tanto persona, compara cu full 2017.
Mirando cu e trend di criminalidad awor aki, lamentablemente hopi persona cu ta bin ilegal via boto of cu nan ta overstay, etc. ta birando sospechosonan di crimen, ta sumament e importante pa keda cu controlnan severo pa loke ta nos frontera y tambe nos leynan di admision y expulsion.
Den cifranan di criminalidad, ta wak bek cu tin personanan cu lamentablemente ta bin nos pais, sea nan ta drenta ilegal of ta bira ilegal y ta bay over na comete crimennan, door di esey, crea un insiguridad di nos pais.
Gobierno, resumiendo, a mustra cu cifranan y tur rapport cu a produci, cu tin un maneho pa combati criminalidad y ta trahando. A bay parlamento cu un maneho amplio, caminda cu a splica specificamente pakico ta biniendo Parlamento. Casi 200 miyon florin di aprobacion, pa por inverti den husticia. A base di esey ta wak awor aki, e atraconan a baha casi te na un averahe di mita di loke nan tabata di 2016/17.
E porcentahe di crimennan cu ta wordo resolvi, ta casi 90%. Segun e minister, ora cu opositornan bin cuminsa cuestiona maneho, prome cu tur cos, si nan ta den parlamento y bay lesa e Memorie van Toelichting y haci nan trabao y bin parlamento.
E minister tey casi tur siman na parlamento pa duna splicacion di maneho, pidi opicion etc. E persona mes, sr. Dowers, e no ta wak’e na parlamento mes. Tempo cu Bikker tabata parlamentario, hasta anochi nan ta reuni, of hasta prome cu aña. Hera bo keda sin bay un dia, nan ta criticabo.
Pero awo, tin di nan, incluyendo sr. Dowers, no ta bin na pia di trabao. Awor aki ta bin critica di pafo.
Haci bo trabao. Lesa e Memorie van Toelichting di 2018 pa e presupuesto di 2018. Minister Bikker ta invita sr. Dowers pa coy su 6 pa 7 pagina, di presupuesto 2010 bin ariba y pone esun di 21 pagina y pico di Bikker banda di dje y bin bisa cu no tin un maneho pa combati criminalidad.
Y e mira den su inbox y habri e documento busca y lesa pa su mes kico e cifranan ta papiando y kico e realidad ta. Criminalidad pa loke ta atraco a baha cu mita.
E porcentahe di resolve crimen ta te na 90%, practicamente tur crimen y cada un crimen, ta un crimen lamentabel. Pero e gobierno aki ta resolviendo casi 90%. E ora ta bisa, si ta haci oposicion, haci oposicion serio si y no keda sin bin parlamento. No lesa bo stuknan, no haci bo huiswerk y despues bin grita pa loco.
