Ana Gabriel a rebiba hopi recuerdo durante su concierto

Tabata algo despues di 10:00pm cu Ana Gabriel a start su show riba scenario den Aruba Entertainment Center na Dakota. Esey despues di presentacion di Mariachi Perla di Aruba, Yolanda van der Linden, Gisela Trimon y Boy Thodé for di Corsou. E cantante, cu a presenta na Aruba ultimo biaha na aña 1994, pues despues di 25 aña a yega nos isla bek.

El a presenta su exitonan un tras di otro y segun e cancionnan tabata cuminsa, asina por a scucha e gritonan di publico compañando cada un presentacion. Mas cu djis un grito di alegria, e gritonan tabata yena di recuerdonan, di momentonan cu cada un di e fanaticonan aki a biba den nan bida for di 25 aña pasa y bin te cu awor.

Un di e momentonan mas emocional tabata ora cu Ana Gabriel a enterpreta un cancion dedicando na Rocio Durcal y Juan Gabriel, cu potret di ambos riba scenario. Claro tur tres artista ta masha conoci y stima na Aruba pa nan cancionnan cu semper ta masha compaña pa palabranan profundo di storianan real di amor, cu hopi hende ta identifica nan mes cune.

Steve Hudson, promotor di e evento aki, por mira atras riba un concierto exitoso, cu na mes momento a sirbi como un regalo pa mamanan di Aruba, cu a habri nan dia pa 12:00am den concierto cu Ana Gabriel. Publico a goza hopi y a keda grita pa “otra” ora cu e concierto a termina. Asina mes Ana Gabriel a complace y a subi di nobo pa duna mas ainda.

Awe merdia e cantante a bandona nos isla den su avion priva cu a trece ayeratardi y a keda warda riba dje. Prome cu el a bay el a topa cu e promotor y a pidi’e pa informa e comunidad di Aruba cu el a keda hopi contento cu e calor di e publico. El a laga un compromiso atras di regresa, sea como cantante of como turista.

Ana Gabriel tin 63 aña di edad, naci na Mexico pero ta bibando e ultimo añanan na Miami. E tin un gira cu lo cuminsa awor den Latino America pero cu lo pasa varios estado di Merca otro aña.