Diaranson ultimo e dama Venezolana residencia na Aruba, Katiuska Alvarez, a haya un accidente pisa na Savaneta y awo ta den un estado asina critico na hospital cu dokternan no ta dunando mas speransa pa su recuperacion.
Amistadnan di Katiuska a bini hunto na hospital cu e peticion pa prome cu yega asina leu di kita e mashin cu ta tene na bida, pa duna nan un tiki tempo pa asina nan por, por lo menos, manda trece su mama Aruba, kende, segun nan, mester tin e ultimo palabra.
Ta pa e motibo aki mes, nan a haci un peticion tanto na minister Dangui Oduber (Salud) y Andin Bikker (Husticia y Integracion) pa por fabor, duna nan e apoyo y permiso pa e mama por drenta Aruba y por ta cu su yiu y dicidi loke ta mas miho p’e.
Katiuska su papelnan ta na ordo y no tin problema cu autoridad. Pero e no tin ningun famia na Aruba. Su amistadnan ta di opinion cu ta mas cu husto pa por trece e mama Aruba via Panama, unda cu e por yega diabierna mes y pa su siguiente dia biaha pa Aruba. Pero sin e consentimento di gobierno, esaki no lo por ta posibel.
Ta pa e motibo aki mes, a suministra un number di celular, cual ta 5657075, pa asina, di un forma of otro, tuma contacto cu nan y brinda nan e apoyo y permiso necesario pa por trece mama di Katiuska Aruba.
Manera ta conoci, pa algun luna caba e frontera entre Aruba y Venezuela ta cera. Prome tabata pa retonan di siguridad interno den e pais y despues pa motibo di e pandemia. No ta importa di unda e Venezolano ta bin, si e sali for di Venezuela, e no lo por drenta Aruba. Awo a hasta introduci visa tambe, pa haci e posibilidad di ingreso mas dificil atrobe. Pero asina mes, den tur e reglanan aki, ta existi excepcion na momento di emergencia of pa rasonnan humanitario.
