Amilia Care Services a habri e siman aki nan prome cas di cuido, Cas di Ma Chia, . den bario di Pos Chikito. Propietarionan a mira e necesidad pa un bon cuido, profesional, di nos grandinan, y a inicio e proyecto pero cu awo ta un realidad.
Mary Ann Kock ta Zorgmanager di e instituto aki, y a splica cu ta brinda diferente tipo di servicio, en comparacion cu casnan di cuido existente.
Banda di cuido na cas, tin servicio na e cas di cuido mes cu tin capacidad awo pa cinco habitante. Nan tin dos camber den cual por ubica 4 persona, y un camber chikito. E ta mustra chikito pero esaki ta pa motibo cu nan ta concentra riba e servicio den dia. Esaki ta nifica cu e grandinan ta pasa dia na Cas di Ma Chia y anochi ta drumi na nan cas.
Nan ta concentra hopi riba actividad di entretenimento pero tambe formanan pa move curpa, bou guia di un fisioterapista. Esaki ta sosode por lo menos un biaha pa siman. Y e ehercicionan aki ta tuma luga den grupo. Si ta necesario, por tin sesionnan individual tambe.
Un otro profesional cu ta forma parti di e team aki ta Carlos Roos, kende ta instructor di fitness pa grandinan.
Kock a splica cu nan kier a cambia e sistema tradicional di cuido pa nos grandinan cu semper tabata conoci den pasado, A modernisa e sistema di un cas di cuido, brindando e servicionan ariba menciona. Ta enfoca hopi riba actividad y banda di fitness, tin un jardin unda cu e clientenan por practica Agri Farming y tambe tin un servicio di terapia cu musica.
E ta sigura cu e servicio cu nan ta brinda ta completamente diferente.
