Bida ta un bendicion, tanten nos tin rosea nos mester balor’e y celebr’e. Riba 18 di maart, mi a bishita Hospice Atardi na Cura Cabai. Manera ta conoci, un hospice ta brinda cuido paliativo na e personanan cu ta den e ultimo fase di nan bida y no por y/of no kier keda na cas mas. Desde aña 2018, Hospice Atardi ta brinda calidad di bida na su huespednan.
Actualmente e cas ta conta cu seis camber. Mi a ricibi recorido di e cas, camber, cushina y mi por a admira e bunita hardin. Hospice Atardi ta cubri su gastonan door di fondo cu e ta ricibi di AZV y donacion di comunidad.
Durante e mainta aki, mi a combersa cu e directora Matsy van Oers y presidente di Fundashon Hospice Atardi Benita Croes tocante e cuido paliativo cu e hospice ta brinda na su clientenan. E team di profesional y boluntario ta brinda cuido 24 ora pa dia na e persona cu ta den e ultimo fase di su bida. E atencion y espacio personal ta central y ta brinda sosten den un ambiente di cas. Ademas di esaki, mi a ricibi informacion y splicacion amplio di e fundacion. Tambe, mi por a comparti y combersa cu un huesped.
Mi ta impresiona cu e bunita trabou, amor y cuido cu e trahado- y boluntarionan ta brinda nan huesped. Mi ta gradici nan pa e excelente trabou cu nan ta eherciendo.
Hospice Atardi ta buscando boluntario. Si bo ta un persona cu ta gusta yuda bo por atende e mainta informativo cu ta tuma luga diasabra 23 di maart pa 8:00am.
