Un trahador di un contratista a wordo kita for di trabou na WEB. Durante e ora di trabou el a haci cosnan cu no ta corecto. Seriedad na trabou ta algo importante.
Na Aruba henter e comunidad pagador di coriente y awa tin wowo riba e companianan estatal di. gobierno. Principalmente WEB y Elmar ta dos di e companianan cu trahadornan mester zorg pa tene e nomber di e compania na halto. Den e caso aki un trahador cu ta trahando via un contratista a haci weganan durante ora di trabou. Cu ekipo di trabou el a haci wega den shop di mantencion. Apart di haci weganan den ora di trabou a graba esaki cu telefon y pone riba FaceBook tambe. E comportacion di un trahador asina ta trece iritacion tambe cerca otro trahadornan den cercania cu ta haci nan trabou cu dedicacion y amor tur dia. Poniendo y exponiendo tipo di weganan asina na pia di trabou ta duna motibo pa pueblo cuestiona y cu razon. Pesey mes ora gerencia di WEB a tuma nota di e comportacion di e trahador di contratista y riba nan propiedad durante ora di trabou, nan a actua mesora. A yama e trahador aki aden y a bay atende cu su actuacion. Na lugar di e trahador acepta y purba di evita algo asina pa futuro, el a escohe di rabia y reacciona den forma rabia y negativo. Cu e comportacion aki di wrong and strong a duna motibo pa retira e trahador y bisa e contratista cu pa WEB e trahador aki no ta bon bini mas. A base di e decision tuma contra e trahador via contratista, algun trahador vast di WEB mes a dicidi di protesta. Como diez trahador dialuna mainta a pone trabou abou pa un rato. Nan motibo di protesta ta pasobra cu nan no kier pa algo similar pasa cu nan. Y nan no kier pa WEB mayan tambe kita nan for di trabou si nan tambe comete algo asina. E mentalidad aki ta robez. Na lugar di nan siña di e eror cometi y zorg pa nan no haci mescos y evita problema, ta purba hustifica cu si nan tambe hacie no wordo kita. Na WEB ta un lugar serio pa traha y no tin espacio pa haci wega ora di trabou cu ekipo di trabou y djey expone esaki tambe riba rednan social. E imagen di WEB ta importante y ta deber di e trahador mas abou te na esun den top pa cuida esaki den un forma serio. E trahadornan cu a protesta no a keda largo y djey a bay traha bek. No ta conoci si gerencia a duna oido na e trahadornan cu a protesta.
