Director di WEB, Alfredo Koolman, a comenta durante di un rueda di prensa diaranson, cu riba e dia aki tabata 257 dia di produccion di coriente continuo na WEB Aruba NV. Sin interupcion tabatin produccion.
Esaki ta danki n’e operadornan di WEB y cu aporte di tur departamento ta logrando esaki. A stabilisa e planta nobo di motornan RECIP 4 y ta sigui consolida. No ta na unda cu mester ta ainda, pero ta riba e bon caminda.
WEB Aruba NV ta trahando cu dos task force, uno di WEB y uno di e suministrado di e motornan Wärtsilä pa varios luna caba y hunto ta ehecuta e plan di stabilisa y consolida na un manera eficiente y efectivo.
E traspaso definitivo di e planta nobo RECIP 4 lo tuma luga posiblemente na november.
Tin un demanda halto di coriente debi na actividad economico y di construccion. Pero tambe door di ola di calor.
A conoce p’e produccion di WEB Aruba NV record di 160 Megawatt y e demanda pik ta sigui crece e aña aki y ta anticipa un record nobo di 165 Megawatt.
Un biaha mas e informacion aki ta regarda produccion di coriente door di WEB Aruba NV y no ta regarda distribucion di coriente door di NV Elmar.
