Israel actualmente ta den guera cu Hamas na Gaza y esey sigur tin efecto riba prijs di petroleo, cu a aumenta mesora. Sigur WEB Aruba NV ta vigila esaki di cerca. Segun director di WEB, Ing. Alfredo Koolman, durante un conferencia di prensa diaranson, tin un team cu ta vigila e prijs di azeta continuamente. Pa loke ta trata aña 2024, ya tin 50% di e volumen di azeta caba gehedge. Ta buscando e chens pa hegde e otro 50%.
Mundialmente ta bin hopi reaccion riba esey, cu e situacion di Medio Oriente ta preocupante y tin efecto riba prijs di azeta, cual WEB tambe ta vigila. Sinembargo a opta pa hedge e prijs den 2024, cu opcion pa hedge mas tanto posibel.
Tin cu sigui vigila, cu t’e manera cu WEB ta bin ta haciendo. Asina cu tin cambio den prijs, e team ta pone gerencia di WEB na altura. Koolman mes ta mira prijs di azeta naturalmente. Mientras cu Aruba ta depende di azeta, tin cu sigura cu por maneha e riesgonan, el a comenta.
REDUCCION DEN PRIJS DI AWA
Alfredo Koolman a sigui splica, door cu ta buscando balans den e cuater componentenan, disponibilidad, continuidad, prijs, e parti di medio ambiente. Segun Koolman, cu e RECIP 4, ta bay di 4 mil bari pa dia, pa menos cu 3 mil bari pa dia cu e planta nobo, cu ta un yabi pa reduci e dependencia di HFO (Heavy Fuel Oil) cu LNG. Ta premira, si tur cos sigui bon, cu lo ta posibel pa genera coriente den e siguiente dos pa tres aña.
Esey lo contribui n’e aspecto di medio ambiente, no tanto riba e prijs. E yabi ta cu ta bay desaroya e proyectonan di energia renobabel. Eynan e yabi cu lo bay impacta e prijs di coriente y di awa.
