E deseo di polis ta pa mas tanto hende cuminsa tene cuenta cu otro, segun Alex Pieters di e departamento di motorbrigade di Cuerpo Policial.
Nos ta bay drenta den un periodo hopi druk. Lo ripara cu ora dia di fiesta yega, tin cierto dianan tiendanan lo ta cera.
Un dia prome cu pasco of 24 di December, hopi hende lo bay core pa otro, lo bay subi speed, ta bezig ta snijaf y ta mira cu e accidentenan lo subi halto.
Kier pa e hendenan tene un tiki pasenshi. Tene cuenta cu otro den trafico y duna chens. No mester lubida, mundo no ta cabando. Si bo djis haci bo cosnan tempran, bo ta logra.
No bay purba di rush. Trafico ta basa riba cooperacion. Tin reglanan di preferencia, entre otro.
Pero dado momento e regla mas importante ta pa tene cuenta cu otro, coopera cu otro, vooral e parti di alcohol, pa e hendenan cu no solamente pa esnan cu ta bebe constant, pero tambe pa esnan cu no ta bebe hopi. Vooral den e dianan cu bo traha y bo dal dos pa tres drink, bo no a come bon y ta cansa. E parti aki lo duna un efecto hopi mas grandi y lo bay haya hopi hende bebi toch coriendo.
Purba di zorg pa tin un hende core auto, yudabo door di dunabo un lift. Asina yuda otro. Esun di mas importante cu tin cu menciona ta cu si bo mira un hende cu ta hopi bebi, burachi of no por mas cu su curpa, yuda e persona aki. Purba di kita e yabi for di dje, ofrec’e pa dun’e un lift. E momento ey e rabia cubo, e no lo ta masha cooperativo, pero e siguiente dia e lo gradicibo cu lo bo a hib’e su cas. Por ta e no ta ni corda mes mas con fastioso e lo a haci.
Purba di yuda otro, tene cuenta y coopera cu otro. Esey ta full e triki pa nos keda sigur fin di aña.
Consecuencia si haya un hende bebi na stuur
Si para un persona cu wordo deteni pa core auto bao di influencia di alcohol, e ta bay wordo deteni. E momento ey ta bay warda pa pasa full e proceso di presenta dilanti di fiscal auxiliar.
Tin hasta chens di bay cera tambe e anochi ey. Bo tin cu bay pasa un test riba un otro mashin, cu e riesgo, depende con halto supla, e rijbewijs por wordo kita.
Tambe ta bay haya e ora un boet di bay paga. E siguiente paso ta si bo wordo deteni pasobra bo a core auto roekeloos y haci cosnan peligroso riba caminda, core duro, pasa luz cora, no duna preferencia, haal in, causa peliger, e articulonan ta cuminsa subi.
No solamente e articulo di core bao di influencia, pero e ora e ta bira un otro articulo unda cu depende di e infraccion, e boet por subi.
E por bay hopi lihe na 1000, 2000 of 3000 bay ariba. E ultimo fase ta, si bo causa un accidente y bo ta bao di influencia di alcohol. Eynan ta bay bira e parti di con pisa e accidente tabata. Ki peliger tabata tin. Si e chauffeur tabata fout. E peliger cu bo a causa, e persona aki ta herida, e ta herida pisa of hasta a causa morto, e ora por bay cera pa algun aña.
E ta varios cos cu por sosode. E tin su consecuencianan hopi pisa. Na esun di mas basico, den un control cu wordo para y e rijbewijs a wordo kita, ya caba por imagina cu por tin influencia si abo ta e persona cu bo mester di bo auto pa bay traha, awo bo no por core auto, pasobra bo rijbewijs ta kita.
Bo tin bo responsabilidad cu bo famia, cu bo cas, cu bo trabao. Eynan caba e consecuencianan ta cuminsa. Na e ultimo bo por imagina si bo bay cera, bo ta perde bo trabao y tur cambio den e bida cu lo bay bin pabo, pa bo famia y e trabao. Bo situacion di bida lo cambia completo. Miho pa bo evita esaki, keda na e banda sigur, enbes di tuma e riesgo y hayabo den un problema cu bo no ta bay saca bo curpa mas afo.
