Pa algun dia caba e ta un sumpiña den wowo di Polis cu nan tin un Academia di Polis cu ta casi cay den otro mientras cu Minister di Husticia Rocco Tjon a otorga un contracto di 700 mil florin na un compania di mercadeo local. “Nos ta traha cu tur gobierno y diferente minister. Y nos a gana e destaho publico aki …. y mayoria di e placa ta bay den media y no pa e agencia mes,” tabata un parti di reaccion di Aldrich Croes. E ta propietario di ECA Marketing & Advertising Group.
E suma aki di tres kwart miyon florin no solamente a causa disgusto bou di e polisnan pero tambe den diferente sector. Te dia di awe e mandatario encarga, Rocco Tjon, no a duna un splicacion pakico di un campaña asina grandi ta necesario pa siguridad den trafico.
E 700 mil florin no ta pa e agencia mes, sino ta uza esaki pa e diferente gastonan envolvi. E agencia loke cu e ta haya pa traha e plan y maneha esaki ta rond di 10 pa 15%. Y e resto ta bay pa contrata companianan pa haci estudio, companianan cu ta traha y hinca video den otro y tambe na media cu ta pone e propaganda riba nan rednan social.
Pero tambe el a bisa cu e no a haya e contracto sin mas. ECA ta un di e agencianan di mas aña di existencia na Aruba. Un agencia cu, den su palabranan, ta traha cu tur gobierno y entidadnan na Aruba. Ta participa den varios destaho publico pa aña. Ta posee un team grandi cu ta prepara e plan cu nan ta participa cu ne den destaho.
Den e caso di e campaña pa siguridad den trafico, ECA no tabata e unico cu a participa. Incluso tabatin companianan di afo y toch e plan di ECA tabata esun cu mas a hala atencion. “Nos ta contento cu nos plan a wordo acepta y nan mester ta contento cu un compania di Aruba a gana e destaho aki.”
Pa un relato mas amplio lesa TREMPAN.
