Aruba Airport Authority N.V. (AAA) ta raporta riba prestacion di Aeropuerto di Aruba den luna di juni 2021, un otro luna di recuperacion solido desde cu e pandemia a cuminsa na maart 2020.
Den juni 2021, Aeropuerto di Aruba a procesa 84,754 pasahero cu a sali for di Aruba. E cantidad di pasahero na salida tabata 20% mas cu e luna anterior. Durante e ultimo luna, Aeropuerto di Aruba a recupera 80% di e cantidad di pasahero cu a sali durante e mesun luna na 2019.
Den juni 2021, 74,566 pasahero a biaha pa Merca, 4,384 pasahero pa Europa, 2,235 pasahero pa Antia Hulandes y 3,569 pasahero pa Latino America. E cantidad total di pasahero cu a sali for di Aruba den juni ta 83% mas halto di loke a wordo premira pa e luna aki.
Un Passenger Load Factor (PLF) averahe na salida di 80% (cantidad di asiento ocupa den e cantidad total di asiento disponibel abordo na momento di sali for di Aruba) a wordo yega pa e mercado Mericano durante juni 2021. E PLF averahe pa tur mercado tabata 78% durante e mesun temporada (compara cu 2019, unda e PLF averahe pa tur mercado tabata 85%).
Durante e ultimo luna, Aeropuerto di Aruba a atende un averahe di 26 buelo pa dia, esaki ta menos si compara cu 35 buelo diario durante e mesun temporada na 2019. Den juni 2020 aeropuerto a atende solamente 53 buelo pa ful e luna mientras cu nos frontera tabata cera pa operacion comercial.
