Tin varios ciudadano cu ta yamando e oficina di AruParking tur dia p’asina mira ki ora nan mester cuminsa paga, ya cu a detecta cu tin varios mashin cu ta fo’i servicio. Contesta cu a haya ta cu ta trahando riba esaki y mientras tanto ta parkeer por nada
A puntra Minister Ursell Arends, Minister di Transporte riba e echo aki, kende a comenta cu desde diaranson siman pasa a upgrade e mashinnan y a ricibi nan interface cu SETAR. Pero tin algun cos cu no ta canando bon.
Desde diahuebs mainta 7:00 am tabata trahando pa lanta algun di e mashinnan cu ta down ainda y lo sigui den e proximo dianan pa tur e mashinnan cu ta bay opera unda parkeo ta obligatorio pa paga, lo ta lanta y cuminsa opera debidamente.
Arends a indica cu aña pasa october, a anuncia cu AruParking lo drenta den un era nobo. Ta conoci cu no tur ora e decisionnan ta popular, pero tin di bisa si cu pa trece regulacion den centro di ciudad pa cual ta parkeo, tanto e comerciantenan cu ta estableci caba y e inversionistanan cu kier inverti, ta un tema hopi importante pa nan cu e parkeo ta regula.
Tin tres punto cardinal p’e inversionistanan, segun e Minister. Tin control, tin orden y tin mobilidad. Cu esey ta loke gobierno ta garantisa cu e reintroduccion di AruParking.
Pocopoco tambe esaki lo haya sosten di comunidad, pasobra nos tur kier yega den centro di ciudad, sea den Caya Betico Croes, Wilhelminastraat of cualkier otro caya y haya un luga di parkeer, caminda cu por baha, haci diligencia of compras y despues por yega bek na nos auto.
NO TIN DIFERENCIA DI TARIFA
No tin un diferencia di tarifa entre local y turista. E suma ta mesun cos. Tin ‘Stop & Go”, cu ta un florin pa 30 minuut. Dos florin pa ora y pa loke ta trata vergunninghouder, esey ta 75 florin pa luna. Tin tambe BPV, cual ta pa compania di carga of cu constantemente ta bin pa reunion den centro di ciudad y cu no ta ubica eyden, pa un suma di 105 florin, por cumpra un di e permisonan aki.
