Durante un conferencia di prensa, Presidente y CEO di AHATA, Tisa LaSorte, a anuncia AHATA su campaña di conscientisacion “Encontra bo Pasion” y su plataforma digital. E obhetivo di e campaña ta pa brinda apoyo na nos comunidad cu consehonan riba e proceso di solicitud y entrevista pa trabou, motivando tur persona cu ta interesa pa ta debidamente prepara.
Como un asociacion lider representando mas cu 150 miembro den sector di hospitalidad y turismo, AHATA ta pone gran enfasis na areanan cu tin mester di mas atencion den e sector. Un di nan ta scarsedad di trahado den e sector di turismo,no solamente na Aruba pero mundialmente. Den dialogo cu AHATA su miembronan, por conclui cu frecuentemente, falta di preparacion ta resalta durante e proceso di aplicacion y entrevista. Cu e campaña aki AHATA ta brinda sosten na e aplicantenan door di brinda e instrumentonan necesario pa un proceso di aplicacion exitoso.“AHATA ta convenci cu un bon preparacion pa e proceso di solicitud y entrevista ta un paso crucial pa sigura exito den haya trabou”, Tisa LaSorte ta afirma.
Pa mehora e chens pa un aplicante haya trabou den sector di hospitalidad y turismo, AHATA a desaroya amitatraha.com. Un plataforma digital crea pa asisti tur persona cu ta interesa den e sector aki, cu consehonan riba con pa aplica pa un trabou na un manera mas eficiente, con pa traha un CV, preparacion pa entrevista, con pa bisti pa un entrevista, y tambe considerando varios otro aspecto importante durante e proceso di aplicacion. Tur persona cu tin interes den labora den sector di turismo y hospitalidad por bishita amitatraha.com y sigui tur e pasonan pa ta miho prepara.
“Nos ta kere cu cada funcion den e industria di hospitalidad y turismo ta un oportunidad pa un persona descubri nan berdadero pasion. Preparacion pa entrevista nan no solamente ta aumenta e chensnan di un persona pa haya trabou, pero tambe ta eleva nan confiansa y duna e oportunidad di destaca nan potencial” LaSorte a indica. “E campaña aki ta alinea cu e mision di AHATA di eleva e sector cu AHATA ta representa y yuda demostra e pasion y profesionalismo di un candidato na momento di busca un trabou den turismo.”
LaSorte ta indica di ta consciente cu e preparacion pa solicitud y entrevista di trabou no ta facil. E plataforma amitatraha.com, ta brinda sosten, conseho y ta mehora e chens di haya un trabou. Pa wak e vacaturanan disponibel den e sector di turismo por tira un bista riba AHATA Job Center ahata.com/career-center.
AHATA ta invita un y tur pa bishita amitatraha.com y descubri nan pasion den sector di turismo y hospitalidad.
Yoliane Everon, representante di Departamento di Progreso Laboral (DPL), a indica cu nan ta gradicido na AHATA pa invita nan forma parti n’e plataforma aki. E plataforma aki ta uno innovativo y ta yena cu informacion valioso pa esunnan cu ta busca un trabou. DPL a invita tur persona cu ta buscando un trabou pa bay riba e plataforma, unda tin un link pa tur vacatura existente na DPL. Tambe si ta desea di inscribi como un buscado di trabou, por haci esey via e plataforma aki.
Segun Everon, pa motibo cu nan ta trahando hunto cu AHATA, ta planeando un dia pa guia persona cu ta desea ayudo con pa traha ariba e plataforma. Ta bay pone un dia na DPL unda hende por presenta y yuda nan haya informacion cu e plataforma, tambe con nan mester traha CV. Lo haci esey hunto cu AHATA.
