Awe ta un dia pa refleha riba e importancia di turismo pa nos economia y riba cual forma di turismo nos kier pa nos pais den futuro y pa celebra e miles di hende cu ta labora cu amor y dedicacion den e industria pa sostene Aruba su bienestar.
Den su mensahe na ocasion di Dia Mundial di Turismo AHATA a menciona cu ta importante pa realisa awe cu ainda nos tur no ta tuma sostenibilidad na serio. Sector publico y sector priva mester dedica su mes na metanan serio pa proteha nos isla su naturalesa y sostene nos comunidad, mientras cu ta motiva servicio optimal na e personanan cu a scoge Aruba pa nan vakantie.
Ta celebra Dia Mundial di Turismo riba tur 27 di september desde 1979 y ta pertenece na un di e 17 metanan di Metanan di Desaroyo Sostenibel di Nacionnan Uni.
Dia Mundial di Turismo a enfoca precisamente riba turismo sostenibel, cu e lema ‘Biaha, disfruta, respeta’
