E sector hotelero ta boga pa Gobierno baha prijs di awa y coriente, e luna aki ainda! Esaki nan a skirbi den un carta oficial na tur gobernante y compania estatal encarga cu produccion y distribucion di awa y coriente. Dia cu a aument’e a bisa cu ta pa seis luna so y esey entretanto a transcuri. AHATA ta sigura cu e aumento drastico di tarifanan di utilidad a haci un impacto grandi riba nan gastonan di operacion, mientras cu rond mundo prijsnan a baha.
Den un carta fecha dia 9 di januari 2023, dirigi na Minister di Labor, Energia y Integracion, Glenbert Croes, na Minister di Asunto Economico y Desaroyo Sostenibel, mr. Geoffrey Wever, na Director di W.E.B, Alfredo Koolman, na Director di N.V. ELMAR, Antony Irausquin, na Prome Minister di Aruba, mr. Evelyn Wever-Croes y na Utilities N.V, Antony “Ton” Rojer, a pone na nan atencion lo siguiente.
“Un luna pasa (6 di december 2022) nos a manda un carta pa informa tocante e reduccion priminti pa awa y coriente na Aruba den aña 2023, pa medio di e carta aki nos ta spera e respuesta pendiente”, asina Tisa LaSorte-Henriquez, presidente y CEO di Aruba Hotel and Tourism Association (AHATA) a skirbi.
“Ademas cu gobierno y W.E.B. a anuncia e intencion for di aña pasa pa aumenta e tarifanan di e servicionan publico pa unicamente seis luna, globalmente e prijsnan di heavy fuel oil a disminui di un manera significativo desde e prome seis lunanan di 2022.”
E representante di companianan di e sector di turismo y HORECA a enfatisa cu “Teniendo na cuenta e carga financiero cu e aumento di e tarifanan di servicio publico a pone riba e consumidor- y empresanan di Aruba, y e carga adicional di e aumento reciente di impuesto, AHATA ta considera cu ta esencial pa bienestar di comunidad, pa reduci e tarifanan den e siguiente trinta dia.” AHATA ta spera di por ricibi un contesta mas lihe posibel y alabes ta disponibel pa un reunion pa discuti esaki personalmente, si ta prefera esaki.
