Minister Chris Romero, encarga cu e Cartera di Sector Primario, conhuntamente cu WEB Aruba, a firma un acuerdo di tarifa preferencial di awa pa nos agricultornan, horticultor y criadornan di bestia cu ta produci pa un meta comercial na Aruba.
Un actor importante den realisacion di e proyecto aki ta e Departamento di Agricultura, Cria y Pesca (Santa Rosa), cual for di cuminsamento a aporta cu datos y calculonan. Santa Rosa lo ta encarga cu e registro y control di produccion pa cada projecto. E acuerdo aki a bira un realidad awor y esaki sigur ta un noticia positivo den esfuerzo di Minister Chris Romero pa fomenta desaroyo di Sector Primario como un pilar economico na Aruba
Tur Cunukero y Criador registra na Santa Rosa y cu ta registra na Camara di Comercio (KVK), lo por aplica pa haya awa produci na un prijs fiho di Awg 5,50 pa m3 (meter cubico), cu un compra minimo garantisa di dies (10) m3.
Pa por tin un miho control y structura, Santa Rosa a establece un lista di rekerimento cu e Cunukero lo mester cumpli cun’e pa ricibi e prijs reduci, cual ta encera entre otro;
- E cliente mester tin un parcela di tereno cu un superficie di por lo menos 400 m² cu ta totalmente destina pa agricultura, horticultura y cria di bestia. Esaki mester ta registra como propiedad di Pais Aruba y destina pa Agricultura/Criansa di bestia of cu ta su propiedad y ta realisa un actividad agricola riba esaki, cual ta registra tambe na Camara di Comercio.
- E cliente mester tin un minimo permanente di 400 m2 di parcela pa uzo di agricultura, horticultura y cria di bestia. E agricultura y horticultura no ta inclui explicitamente e floricultura of cultivo di mata di decoracion of cultivo di cannabis;
- E awa suministra via un meter agricola tin di wordo uza pa fin di agricultura y horticultura comercial, temporalmente mediante un sistema di irigacion via gota cu tuberianan di distribuimento cu su valvenan y slangnan di awa conecta pa muha e matanan. E cliente ta responsabel pa instalacion y funcionamento di esaki y otro instalacionnan rekeri.
- E cliente ta obliga pa uza e awa di e meter agricola exclusivamente pa su propio parcela y unicamente pa actividad di agricultura, horticultura y cria di bestia. Ta keda prohibi pa uza e awa pa for di e tereno pa cualquier motibo, ni door di e interesado ni pa otronan.
- Den caso di uzo di un tanki intermedio (buffer tank), e tanki mester tin un bon ruta di acceso pa e sistema di suministro di awa via e meter di awa pa agricultura pa e parti mas ariba di e tanki, na unda ta almacena e awa cu e coneccionnan necesario pa un bon ruta di acceso. E sistema di suministro di awa mester tin un sistema di transito hermetico sin ningun lek.
- Entrante aña 2021 lo bay ta mandatorio pa e agricultor y criador sigui anualmente un “Programa di Certificacion di Calidad” conoci como GAP (Bon Practica pa Agricultura) y permiti inspectornan autorisa di Santa Rosa (DLVV), Departamento di Higiene (DVG) y / o WEB NV drenta den su instalacionnan pa controla higiene, registro di informacion di produccion of pa tuma muestranan di awa.
- E cliente mester ta registra na DLVV/Santa Rosa. Na momento cu registra como agricultor of criador e persona mester presenta e copia di su contract di huur di tereno of titulo di propiedad hunto cu un identificacion valido y firma un, hunto cu un declaracion di cooperacion cu DLVV tocante presentacion di informacion y cifranan di produccion mensual di su proyecto di agricultura, horticultura of cria di bestia.
- Un cliente ta rekeri pa entrega dos (2) potret tipo pa paspoort; un ta bay den archivo y e otro ta bin riba un carnet oficial cu ta bay sirbi como prueba di registro na DLVV.
- Santa Rosa, lo mester ricibi mensualmente cada 15 di luna un “Informe di produccion” di e cliente.
- Den caso cu departamento concerni cu infrastructura retira un tereno di huur for di un persona cu no ta practica agricultura of criansa di bestia, e cliente ta rekeri pa informa DLVV di esaki di inmediato, cual ta haci cu e cliente no lo tin derecho mas pa e tarifa special pa agricultura of cria di bestia. Tambe den den caso cu tin un cambio di tereno, DLVV & WEB Aruba NV tin di ricibi notificacion via di un carta of e-mail na [email protected].
- Si un cliente no cumpli of no cumpli suficientemente cu un of mas di e reglanan anterior, e no ta bin na remarca pa aplica pa e tarifa special pa agricultura, horticultura of cria di bestia y e acuerdo ta keda termina pa Pais Aruba. DLVV lo notifica WEB Aruba NV inmediatamente di e terminacion di e acuerdo aki.
