Un susedido basta serio a tuma luga cu dos menor di edad despues di ora di scol. Un homber a manda vehiculo riba nan y baha for di auto y cu bate den man a comete destruccion riba e bicicletanan.
Diaranson alrededor di 1:40PM Polis a presenta den caya Emmastraat unda cu 2 mucha homber a bati alarma pa un homber cu a dal nan intencionalmente cu su vehiculo. Segun e muchanan ta conta e persona tabata den un Toyota Yaris (color beige) A-21005 y cu tabata parse di ta bou influencia.
Muchanan a mira oportunidad pa crusa mirando cu e auto tabata basta leu, pero e homber di e yaris no a gusta. Cu asombro e criaturanan a mira con e persona a bira su auto y dirigi esaki den direccion di e muchanan. Door di e impacto cu e auto el a laga e muchanan cay. No tabata suficiente e intento serio aki e persona a dicidi di saca un bat di su auto y cuminsa destrui e bicicletanan mientras e ta insulta e muchanan. Cu palabra no mucho bunita na direccion di e muchanan y saca dede malo pa nan.
E muchanan no a duda mes y a core yama polis cu ayudo di hendenan cu tabata den e area. Polis a presenta mesora na e sitio y a topa cu e homber cu a haci e acto aki. A papia cune y finalmente e homber a sigui. Polis a conseha e muchanan pa nan avisa nan mayor pa nan bay entrega un keho na polis.
E mucha homber tabata hunto cu su ruman homber cu el a bai busca na scol. Un caso serio y lamentabel pa e dos criaturnan aki na man di un persona peligroso capas di un acto asina aki.
