“Manera indica na october 2020, cada kwartaal nos lo actualisa nos pronostico di varios aña. Den e prome kwartaal di 2021 nos ta mira un recuperacion mas slow di loke nos a premira na october pa e añanan nos dilanti. Nos ta sigui den contacto diario cu nos partnernan den e industria di aviacion y turismo pa adapta y cambia nos pronostico(nan) si ta necesario,” segun un comunicado di Aruba Airport Authority.
Nan ta informa cu e pronostico aki ta basa riba tur informacion cu nan ta dispone di dje te cu awe. E pronostico di varios aña ta keda fluctua y nan lo keda haci e maximo esfuerso pa yuda Aruba den su recuperacion necesario, asina Joost Meijs, CEO di Aruba Airport Authority N.V. (AAA) a indica.
Na final di 2020 Aeropuerto di Aruba ta spera di a procesa aproximadamente 430,000 Revenue Generating Passengers (RGP) (e cantidad final lo bira conoci den e siman nos dilanti). Esaki lo nifica un recuperacion di 34% di RGP cu a wordo procesa na Aeropuerto di Aruba na 2019.
Basa riba e network cu Aeropuerto di Aruba tin di su aerolineanan partner y basa riba informacion ricibi for di asociacionnan di e industria di aviacion (IATA, ACI, ICAO, etc.) Aeropuerto di Aruba a determina su pronostico actualisa pa e añanan na caminda pa loke ta e cantidad di pasahero cu lo sali for di Aeropuerto di Aruba (Revenue Generating Passengers).
Manera por mira, Aeropuerto di Aruba ta calcula na e momento aki cu lo recupera 34% na 2020, 46% na 2021, 68% na 2022, 78% na 2023, 84% na 2024 y 90% na 2025. Esaki ta nifica cu Aeropuerto di Aruba a ahusta su pronostico pa 2020 for di 37% di recuperacion pa 34% di recuperacion. Pa aña 2021 esaki a wordo ahusta for di 52% di recuperacion pa awo 46% di recuperacion. Pa e resto di añanan Aeropuerto di Aruba ta keda positivo cu lo alcansa e porcentahenan di recuperacion indica en comparacion cu 2019. E ultimo lo sigui cambia manera e añanan ta acercando y Aeropuerto di Aruba tin miho bista riba e airlift pa e añanan ey.
