Ainda tin un grupo di ciudadano cu ta preocupa kico ta bay sosode cu e placa cu nan a inverti cumprando un condominium den e proyecto Aqua. Un grupo di inversionista cu a dicidi di bay di acuerdo pa bende nan parti y haya timeshare a cambio, ta haci cu awe un grupo a resulta perhudica pasobra no a haya nan placa bek. Dos di e cumpradonan perhudica ta e pareha Adrian Bianchi y Susana Matteo.
E proyecto di condominium Aqua awendia a bira un hotel opera cu e nomber di Radisson Blu.
E pareha ta splica den nan declaracion cu Aqua Condominium tabata promove e benta di unidadnan (camber) den un edificio di vivienda cu e promesa di ta 100% doño y a dura mas cu 10 aña prome cu construccion a finalisa. “Pero loke ta mas alarmante, ta cu a cambia por completo e contracto original (traha y firma na notario), sin pone e cumpradonan na altura y duna tur bentaha na e desaroyado, Basiruti C.V. (ACQUA PROJECT) kende ta representa pa e Bufete di Abogado “De Cuba/ Ormel/ Noordhuizen”.”
Nan ta sigui splica cu un tempo prome cu cambio di e contracto di forma “unilateral y prehuicioso” nan, e pareha, a haci un demanda den Corte na Aruba, unda cu ta pidi pa entrega, cumpliendo cu e contracto original. Pero no a cumpli.
Nan a apela y a bay Hof, unda cu e decision ta bisa cu mester cumpli cu e contracto. Pero, segun Bianchi, Aqua te dia di awe, 15 di augustus, 2023, no a entrega nan e apartamento. “Nos prome abogado di Bufete Croes, Wever, Ruiz” a bisa nos cu apesar di a gana e caso, no por bay contra e deseonan di e desaroyado, Basiruti C.V., y cu no ta entrega sin cu nos firma un addendum, sin extorsona y despues di un tempo a informa os cu nan ta stop di duna nan servicio.”
E pareha ta enfatisa cu nan a haci un demanda, a gan’e, a paga un suma grandi di placa na Bufete Croes, Wever Ruiz y Acqua ta haci loke cu nan kier, no ta cumpli cu sentencia di Hues na Aruba ni di e Corte di Hof na Corsou.
Despues, ta sigui conta, a acudi na abogado Carol Lejuez, kende a bisa nan cu ta posibel pone un embargo pa pone nan cumpli cu e orden di entrega, pero aki ta caminda cu e abogadonan di Acqua ta menasa deurwaardernan cu accion legal si nan pone embargo.
“Pero esaki no ta tur cos, pa bay mas leu Acqua, ademas di disolve e contracto anterior obligando pa firma un addendum a realisa e entrega di e unidadnan cumpra (nos mester aclaria cu nos a consulta cu otro notarionan di Aruba y di Hulanda, y tur ta coincidi cu e addendum y subdivision di e terenonan cu nan a haci ta ilegal). E subdivision di tereno y areanan comun cu ya nos a paga, nan kier kita nan for di nos gratuitamente, kitando derechonan adkiri. E disolucion y registro kadastral nobo, a wordo haci pa Notario Chamilla Tromp, kende a wordo informa di e malcontento di clientenan pa firma e addendum. Y tambe e ta debidamente informa di e sentencia duna door di Cortenan y cu Basiruti C.V. no a cumpli cu nan. Apesar di esey, Notario Tromp a traha na fabor di Acqua sin tene na cuenta e derechonan di e cumpradonan y tur e dañonan cu a ocasiona na nan. Nos por a compronde cu e notarionan na Aruba ta nombra pa Corona y no por sirbi un partido sino mester ta neutral y imparcial den nan trabou. Aki a resulta di no ta e caso,” e pareha ta bisa den nan declaracion.
Nan ta haci e siguiente preguntanan: E actonan aki realisa ta legal? (Otro notarionan a bisa cu e no ta).
E ta legal realisa un cambio rotundo di contracto den forma unilateral contra entrega di e apartamentonan? Ta etico y legal kita derechonan adkiri cu firma di contracto notaria y paga efectivo sin ningun accion of consecuencia” Ta corecto, legal y moral realisa mediante Notario un division nobo di tereno- y areanan comun cu ya a wordo cobra, y mientras cu ta na altura cu existi clientenan cu no ta acepta pa forma e addendum y manera, den nan caso, tin un sentencia bon cla cu no a cumpli cu ne.
Nan ta puntra si e Registro Kadastral nobo realisa door di Notario Chamilla Tromp por sigui na vigencia en bista di e condicionnan abnormal pa e cumpradonan, tanto esnan cu a firma e addendum door cu no a mira otro salida como esnan cu no a firma, of talbes mester anula esaki?
Tambe nan ta puntra su husticia lo vence of lo sigui trapa derecho di inversionistanan cu di bon fe a inverti cu gran esfuerso y ilusion na Aruba?
E pareha ta sigui bisa cu e problema aki ta bon conoci cerca Gobierno di Aruba, cu a duna como reaccion cu ta trata di un problema priva, pero nan ta tin e siguiente preguntanan e ora: Registro Kadastral no ta pertenece na e area di Gobierno” E lincencia y permisonan pa hotel, kende ta otorga nan” Kende ta verifica y monitorea e legalidad di e accionnan aki?
“Ademas, segun nos tin entendi, tabata e Bufete di Croes Wever y Ruiz, cu ta pertenece na tata di Prome Minister di Aruba, kende a haci e benta di e tereno na Palm Beach na e doñonan di Acqua Project y un di esnan cu awor ta Minister di e actual Gobierno, tabata anteriormente abogado di e desaroyadonan.” Te aki e declaracion di Adrian Bianchi y Susana Matteo.
