Mainta tempran un adicto ambulante a keda deteni pasobra cu el a lanta deremate y a cuminsa ta manda boter y ta causa daño riba negoshi na final di caya grandi na San Nicolas.
Ta un adicto conoci di husticia cu tabata drumi na loke lo mester a bira un hotel na final di caya. Dado momento el a cana bay na e bari cu tabata tin na porta di Unicon na San Nicolas y a coy varios boter y a cuminsa manda esakinan cu forsa riba porta di e luga. Tres di nan a dal e glas y e esaki a sufri daño. Despues di un rato patruya di San Nicolas a bin cu dogcatcher y a coy e adicto aki y a bay cun’e warda.
A pasa wak e daño cu a tuma luga y despues bandona e sitio pasobra ainda e momento ey e luga no a habri. E cos a pasa den careda di 8’or y e luga ta habri pa 9’or. Mas durante dia a keda di pasa mira e situacion. Ken ta bay paga e gastonan aki, e adicto aki sigur cu no. Ta custumber cu nan no tin manera pa paga. E daño causa ta wordo cubri pa e negoshi mes, sea nan tin seguro, ta cobr’e despues of riba nan propio gasto.
