Fraccion ACCION21 a entrega un iniciativa di ley na Directie Wetgeving en Juridische Zaken (DWJZ) cu ta encera cambio den verlof di embaraso y verlof di mama. Un tema cu pa algun tempo caba ta den desaroyo relaciona cu verlof di paternidad na Aruba, y con su prolongacion por tin un efecto positivo p’e famianan Arubano. Parlamentario Miguel Mansur a extende un invitacion na tur fraccion y miembro independiente pa join e iniciativa aki.
Na Hulanda den 2019, verlof di paternidad a conoce un prolongacion, cual a resona manera un tremendo noticia rond henter e pais. Aki na Aruba sinembargo esaki ta un tema cu ta basicamente neglisha pa basta tempo. E famianan feliz y contento na Aruba ta un pilar importante pa loke ta e ciudadano y ta algo socialmente significante. Un famia feliz ta cuminsa na e periodo di embaraso y nacemento di e yiu, combina cu e proteccion, salud y bienestar di e mama y yiu.
Cu e iniciativa di ley aki pa medio di ACCION21, e ciudadano por spera asina pa mehora calidad di bida di su yiu- y mayornan. Pa medio di esaki lo porfin brinda nan mas derecho durante nan periodo di verlof di embaraso, verlof di nacemento y verlof di partner.
Cambio den ley
E cambionan proponi den e iniciativa di ley aki ta encera prolongacion di verlof di mama for di 12 pa 16 siman, comparabel cu Hulanda y islanan BES. E periodo di notificacion cu empleado embarasa mester notifica nan dunado di trabao ora nan kier tuma verlof di embaraso ta bira mas cortico, pa seis siman compara cu e actual dos luna. Na Hulanda y BES e ta tres siman.
Den caso di hospitalisacion di e baby durante periodo di verlof di mama, e dianan hospitalisa no ta conta manera e dianan di verlof di mama. Si e mama fayece, e dianan di verlof di mama ta pasa na e partner, esposo, pareha registra of persona cu mama tabata bibando cu y cual a reconoce e baby. Esaki ta un innovacion cu Aruba lo ta e prome den Reino pa introduci.
Verlof di tata of partner ta cambia pa medio di aumenta verlof di dos dia pa cinco dia, y awor ta aplica tambe na pareha registra y persona cu ta biba hunto cu e mama of persona cu ta reconoce e baby. Verlof di tata of partner awor ta inclui tambe e derecho pa tuma verlof di cinco siman total. E cinco simannan aki mester ta tuma dentro di seis luna despues di e nacemento di e baby. E dunado di trabao no mester paga mas, e tata ta ricibi 70% di su salario for di SVb.
Aruba no por keda atras!
E posicion di Aruba manera un pais autonomo, y como un di e prome den Reino Hulandes cu a declara su mes autonomo, ta asina pasobra nos pais semper tabata uno cu tabata avansa y bay dilanti den progreso. Pa ACCION21, ta importante pa e ciudadanonan di Aruba sigui mehora su mes constantemente, y sigui avansa pa e bienestar di su pais, su comunidad en general, y tur individuo cu ta biba riba e isla aki. Ora ta toca ouderschapsverlof, Aruba ainda ta hopi atras riba e parti aki.
Esaki ta conta tambe pa loke ta e tema di verlof di embaraso, verlof di nacemento y verlof di partner. Como pais autonomo den Reino, Aruba no por permiti su mes pa no ofrece na su poblacion e derechonan aki den linea cu e otro partinan di Reino y e paisnan avansa.
Miho union entre mayor y yiu
E estudionan haci ta revela cu un verlof di nacemento mas largo ta contribui na un miho union entre mayor y yiu. Otro investigacion ta mustra cu e mayornan y partner cu tuma verlof di biaha despues di nacemento di nan yiu, generalmente ta mas envolvi den cria nan yiu durante nan bida. Tambe, pa e mayornan y partner mes tin efecto positivo. E mayornan cu ta mas envolvi cu nan yiunan ta generalmente mas feliz y saludabel.
Un verlof di cuidado di yiu mas amplio ta expande tambe e oportunidadnan di hende muhe den mercado laboral, ya cu tin menos diferencia den duracion di verlof entre ambos mayor. ACCION21 su proposicion di ley actual ta duna e asunto aki un forma mas stabiel. Tambe e proposicion di ley ta contribui na e desaroyo di un balans den reparticion di trabao y tarea di cuido entre e partnernan den e cas.
Segun e tarea di cuido, ta reparti mas igualmente entre e partner, ta crea mas espacio pa hende muhe, cu awor ainda ta carga mayoria di e tarea di cuido di su yiunan y cas riba nan mes.
Si e partner, cu na mayoria di biaha ta hende homber, ta participa mas den e cuido, esaki ta stimula nan conexion cu e yiu. Sociaal Economische Raad van Aruba (SER) a publica un rapport na fin di 2022 tocante e expansion di verlof di tata. SER ta opina cu e marco legal actual ta ofrece poco dia di verlof pa tata. Actualmente e tata tin dos dia di verlof, y SER ta boga pa amplia esaki, concluyendo cu esaki lo trece beneficio pa e mama, tata y yiunan.
Na Aruba actualmente no tin un verlof di nacemento amplio pa partner na nacemento di e yiu, verlof di embaraso y nacemento ta hopi limita. No tin un verlof amplio pa persona cu tin mas cu un yiu tampoco. ACCION21 ta para tras di e hecho cu a yega ora pa bin un cambio den e parti aki awor, na bienestar di tur ciudadano di Pais Aruba.
