Diadomingo, algo pasa di 5’or y 10 di mainta, patruya di Oranjestad a bay riba e caminda di LG Smith Boulevard, net dilanti di George Cycle Rental, unda cu lo a sosode un accidente basta bon.
Na e sitio, chauffeur di un Altezza cu tambe tabata envolvi den e accidente, a bira agresivo cu polis, cu consecuentemente, polis mester a pidi pa transportwagen pa por a hib’e na warda di Playa pa e por a baha su scamanan.
Testigonan mientras tanto a declara cu e Altezza tabata biniendo for di p’ariba riba un velocidad halto y tabata pasando auto. Y na momento cu el a drenta bek den e fila, e no por a controla su velocidad, cu e consecuencia cu el a bay dal tras di un KIA Picanto color berde, cu finalmente a bay pega den cura di APA.
Dama den e KIA a resulta herida. A pidi pa ambulance ibn na e sitio, pa asina duna e dama atencion medico. Mientras tanto, manera ya menciona, e chauffeur di e Altezza a keda deteni mirando cu no solamente e tabata agresivo, sino e tabata bebi. Daño material tabata considerabel. A pidi pa takelwagen bin hala e Altezza for di caminda.
