Sindicato “Arubaanse Bond van werknemers in Verplegende instellingen (ABV) ta hopi rabia cu nan no a haya invitacion ta topa cu Secretario di Estado Raymond Knops durante su bishita na hospital.
E sindicato ta sinti cu tabata na su luga pa esaki tuma luga, mirando cambionan cu kier haci na y den e instituto aki y como representante di e trahadonan mester a haya espacio pa duna nan comentario na Knops, cu no ta tur dia, siman of luna ta haya chens di topa cu ne.
Pa e motibo e sindicato a dicidi di manda un carta den cual ta expresa loke cu nan kier a comenta na Secretario di Estado.
Ta cuminsa pa menciona e reaccion di Knops dia 27 di october ultimo den Tweede Kamer riba un carta cu RESPALDO a manda encuanto e cortamento di gasto den AZV cu 5 miyon florin pa luna. Nan ta señala cu di su reaccion den Tweede Kamer por a saca afo cu e cortamento di cinco miyon den AZV ta basa riba un conseho di College Aruba financieel toezicht (CAft) basa e rapport di “doorlichting” di PriceWaterhouse Coopers. Door di esaki, nan ta splica cu ABV, hunto cu otro dunadonan di cuido, a manda un carta dia 30 di november pa CAft, pa expresa nan critica. Esaki basa riba e hecho cu sin ningun hustificacion a papia cu mester baha e gastonan di AZV cu 5 miyon florin.
E ariba menciona a pone cu Aruba, pa haya prestamo di Hulanda, a bay di acuerdo y a nifica un reduccion di 11% den entrada di dunadonan di cuido y den practica el a nifica un reduccion di salario di 5% pa enfermeronan.
Nan ta splica cu esaki a bini na momento cu esnan di cuido a duna nan contribucion grandi den e pandemia di coronavirus. Nan ta haya cu mester bini cu un paro inmediato na e 5% di reduccion di salario di enfermeronan. Nan ta bou di presion fisico y mental pasobra e pashentnan di COVID ta exigi cuido extra y mas tempo mientras cu tin escasez di profesional specialisa. Nan ta bou presion psikico pa motibo cu nan ta core e riesgo di cualkier momento keda infecta, y practicamente no por keda den nan ambiente of seno familiar pa no infecta famia.
Loke ta hala nan atencion, ta splica den e carta, ta cu na e islanan rond no a corta den salario y na Hulanda e personal di cuido a haya un bonus di 1000 euro. “ABV ta pensa cu e personal di cuido na Aruba mester haya mesun trato. E trabou debn tempo di COVID-19 no ta menos estresante fisicament of mentalmente. Y tampoco e ta menos peligroso cu nan coleganan na e otro islanan.”
ABV ta finalisa bisando cu nan ta spera cu e carta aki por yuda cu ta pone un pari na e reduccion di salario di e enfermeronan.
