Den oranan di merdia a bati alarma pa tres persona sospechoso cu a bira den area di Commandeursbaai. Probablemente tres persona sin documento cu a yega Aruba for di Venezuela, ya cu ta bisa cu e personanan aki ta papia Spaño.
Tabatin henter un operacion cu helicopter y polisnan na tera banda di veld di Undesa. Esaki ta e area net pabou di Marinierskazerne. No a detene ningun persona.
Sinembargo na momento cu polisnan a bay mas pabou, banda di Santana di Savaneta, a topa cu un homber, tambe di habla Spaño, kende no por a mustra su documentonan mesora. A detene y transporte pa warda unda persona di Warda Nos Costa lo tum’e over pa haci nan investigacion.
Informacion cu 24ora ta dispone di dje ta indica cu tin informacion cu den oranan di marduga un boto a yega tera. Polis a haci un buskeda den oranan di marduga pero no a topa cu ningun persona sospechoso. Y tambe bulto di droga lo a bini den e boto.
Despues den oranan di dia a bini otro notificacion.
E persona deteni tabata cana den e hanchi banda di Santana di Savaneta. E unico cos cu e tabatin den su poder tabata un saco di plastic blauw cu algun pertenencia di dje. E tabata muha y bisti cu slof.