E aña escolar pa Abraham de Veerschool a bay bon. Nan tabata tin alumnonan nobo cu a bin for di otro scolnan y asina mes nan a adapta hopi lihe. Pa e atardi aki e scol su tema di resultado tabata ‘The art is in our heart.’
Pa e scol, e aña escolar aki, nan ta bek na normalidad y asina mes nan tabata tin un 74% di graduado. Jane Bueno Guzman-Hooft, directora di Abraham de Veerschool ta hopi satisfecho cu e resultado. Nan tabata tin un bon aña, e alumnonan tabata hopi activo, pero semper tin algun alumno cu mester un tiki mas push cu ta haci cu nan no ta capta e materia. Esaki por tin diferente motibo cual ta haci e trabou mas pisa.
Nan ta spera mas cooperacion di e alumno- y e mayornan, paso ta hunto nan ta logr’e. Pero nan ta gradicido na e mayornan cu a coopera y tambe docentenan, sin laga afo e directiva di scol. Un team creativo a zorg pa decora e scol pa asina di un manera bunita cera e aña escolar pa e alumnonan aki.
Scol tabata tin 63 candidato, di cual dos a drop out pa motibonan personal. Asina tambe nan a keda cu 61 alumno. Den porcentahe esaki ta traduci den 74% di e candidato cu a slaag. Pero falta esunnan cu ta bay pa e tweede tijdvak cu toch por slaag ainda. Si esaki ta e caso, e chens cu e porcentahe por subi y nan ta spera cu e lo por subi den careda di 80%.
Juffrouw Hooft a recorda cu e alumnonan cu a haci examen den tur normalidad e aña aki, ta e mesun alumnonan cu a pasa den momentonan hopi turbulento den periodo di COVID. Esey ta haci cu mester sigui traha riba cualkier hiato cu nan por a pasa den dje, tanto na nivel personal como na nivel studiantil. Esaki ta haci cu e resultado aki un logro grandi, pasobra cu e alumnonan aki no a pasa henter nan trayecto escolar den tur normalidad.
Pa esunnan cu no a slaag, Hooft a bisa pa nan no desespera. Otro aña sigur lo ta uno miho unda cu nan lo por logra y esaki ta e metodo cu nan a uza e aña escolar aki c’un bunita resultado.
