Den e ciudad di Medellin a haya un Abogado Hulandes di 57 aña morto. Probablemente el a bira victima di un gang cu ta ataca via di fake date. E Hulandes aki no ta prome stranhero cu den un corto tempo ta perde su bida den e area aki. Nan ta uza muhenan pa atrae e hombernan y despues ta ataca nan.
Ministerio Hulandes di Relacionnan exterior a confirma fayecimento di e Hulandes na Medellin.
Den e corant El Tiempo menciona cu a identifica e Hulandes como Kenneth Defares cu ta traha como Abogado.
A haya e Hulandes den un hotel den e bario El Poblado, den caya 11C. Parce cu algun ora prome a mir’e den compania di dos hende muhe. El a fayece diabierna den oranan di mainta y tabatin dos muhe cerca dje.
Segun informacion policial, e dos muhenan a bandona e hotel rond di 5:00 AM, sin e Hulandes. No tin identidad di e dos muhenan ainda.
Autoridadnan na Colombia a indica cu mester tene cuenta cu e Hulandes lo por a bira victima di un gang cu ta busca nan victima cerca stranheronan. Nan ta haci uzo di muhenan bunita pa atrae e hombernan stranhero y despues atraca nan. Ta haci e contactonan via dating apps.
Personal di housekeeping a bin topa cu e curpa na momento cu nan a bay haci nan trabou diario y a topa cu e curpa.
A confisca e curpa pa haci autopsia.
Esaki tabata di cinco victima stranhero den un siman di tempo a haya sin bida. E cuater hombernan y un muhe a wordo haya den circunstancianan diferente. Ainda no a logra mustra un conexion cu otro.
E muhe a fayece durante un ritual di ayahuasca.
