Informacion for di un rapport preliminar obteni for di un stacion amateur, ta indica cu e temblor cu hopi hende a sinti na Aruba awe nochi a registra na 3.6 den e escala di Richter y su epicentro ta ubica cerca di e costa di Paraguana na Venezuela .
Ta trata di un sismo submarino cu a presenta exactamente pa 8:25 di awe nochi na 33.6 kilometer di profundidad y na 57 kilometer zuid west di Aruba, cu ubic’e na e costa di Peninsula di Paraguana na estado Falcon, cerca di Cabo San Roman y Puerto Escondido.
24ora.com a tuma contacto cu Servicio Meteorologico, kendenan a indica di no tin nada registra na Aruba. Mientras tanto FUNVISIS, cual ta entidad oficial na Venezuela, ya a emiti su boletin. Esaki ta e di dos temblor cu a registra na Venezuela riba e dia di awe. E prome tabata pa 10:06 di mainta, di 2.7 di magnitud y su epicentro tabata 16 kilometer noord west di Valencia na un profundidad di 3.6 kilometer.
Na Aruba a sinti e temblor mas tanto den e barionan pariba di brug manera Zeewijk y De Vuyst. Tambe tabatin habitantenan di e districto di Santa Cruz a sinti e tera tembla bou nan pia.
