Un caso basta serio a tuma luga den ora di marduga. A mobilisa unidad di polis cu maximo urgencia pa un sospechoso cu a presenta na un cas na Angochi, cu e unico intencion di causa daño y/of morto na e persona cu ta residencia na dicho cas.
E caso aki a tuma luga den careda di 1:00 am (marduga) ora cu a pidi presencia di polis cu urgencia. Unidad di Santa Cruz a yega e prome biaha, pero e sospechoso a huy y sconde pa polis. A duna polis tur informacion di locual a caba di tuma luga, como tambe descripcion, pero e victima no tabata trankil mirando cu no a logra localisa e homber e momento ey.
E homber di cua manera cu ta, kier a drenta e cas y tabata grita di bay mata e persona cu ta paden.
No a tarda mucho cu e sospechoso a regresa na e cas, menasando un biaha mas cu morto. Intencion tabata pa Sali na careda y sconde un biaha mas, pero e biaha aki si no a logra. Polis a baha riba dje y deten’e.
Segun por a compronde tambe, e persona aki ta un conoci di polis y ta basta agresivo. A transport’e pa warda caminda e lo tin cu bay duna cuenta pa su acto y e mal intencion cu e tabatin na Angochi. Menasa di morto ta delito basta serio y castigabel.
