Ambos ta haci aña dia prome y dia 2 di januari y pa no laga e dia pasa sin mas, e fundacion cu a lanta pa balora polis cu a sirbi nos pais henter nan bida, a pasa bishita nan na nan cas. Wilfred Hart a cumpli aña dia prome di januari mientras cu Elio Dania a cumpli aña dia 2 di januari. Ambos ta polis pensiona.
Wilfred Hart a drenta Cuerpo Policial Antias dia 16 di augustus 1975 y a baha cu pensioen dia 31 di december 2009. Elio Dania a drenta Cuerpo Policial Antias dia 30 di mei 1969, net riba dia di e lantamento na nos isla ruman. Ambos a crece y sirbi nan pais pa sigur un 35 aña largo.
Den nan carera a ocupa varios funcion. Elio Dania a sali como un di e hefenan principal di e districto di Noord. Wilfred Hart a traha pa mayoria di su añanan den e departamento di trafico. El a sali den funcion di sub-inspector pero como un experto grandi den trafico. Te awe ainda hopi biaha sa yam’e pa conseho riba asunto di trafico, specialmente p’e leynan cu ainda ta pendiente pa pasa y pa regula cambio den nos trafico.
E fundacion
Un grupo di polis a forma Fundacion Balorando Polis Pensionado pa honra esunnan cu ta of ta bay bira pensionado. E fundacion ta 100% independiente di Cuerpo Policial di Aruba y ta un non-profit foundation.
Emiliano Baarh, presidente Fundacion Balorando Polis Pensionado, a splica den su casi trinta aña di servicio, el a mira hopi di su coleganan cu awe ta pensionado y tin un aprecio pa nan. El a haya e idea di forma un fundacion pa duna y mustra e aprecio p’e grupo ey.
E fundacion ta consisti pa Emiliano Baarh como presidente, Anushka Harms como tesorero, Ludy-June Wix como secretario, Roberto Brown, Pedro de Verona Kock, Annette Patterson, Jamal Courtar, Zulaica Mitchell y Beverly Akins ta miembro di directiva. E miembronan cu ta forma parti ta haci esaki den nan tempo liber den forma boluntario. Nan meta principal ta pa reconoce e polis cu a baha cu pensioen siendo polis pa reconoce nan ora di haci aña of ofrece un atencion den caso si bira malo.
Homenahe na bida
Ta intencion pa sigui demostra aprecio na e polisnan pensiona, siendo na bida. Despues cu fayece no ta bale la pena mas pa mustra aprecio. Door di haci un bishita cortico y entrega un regalo simbolico ta un muestra chikito di cuanto ta balora nan y ta stima nan. Hopi biaha e grupo tin e tendencia di sinti nan mes lubida. Pero di e forma aki ta dedica atencion na e grupo specifico aki.
