Cuerpo Policial ta sigui cu su controlnan cu ya a cuminsa for di fin di siman. Ta trata aki di un proyecto cu a cuminsa na comienso di e siman aki. Liliana Rasmijn, vocero di Polis, a corda tur hende cu a adverti di e controlnan aki di siman pasa caba. E ta un proyecto cu no solamente ta riba control di trafico, pero kico cu topa riba caminda.
Por bisa, mirando e resultado, el a bay bon. Dialuna a cuminsa den oranan tempran, hunto cu Aruparking, unda cu a parti 45 boet, a takel 6 auto y tabata tin 1 detencion. Diamars tabata tin 65 boet reparti. A takel 7 auto y 3 detencion. E detencionnan tabata pa core auto sin rijbewijs y tabata uno cu no tabata tin su papelnan na ordo.
Awor aki nan ta controlando chauffeurnan cu ta stuur cu celular den man. Hopi biaha ta mira esey. Pa loke tin tambe ta papelnan di auto no na ordo y e chauffeur mester tin su rijbewijs valido cun’e, sino e lo bay warda.
Ley ta bisa cu unabes cu bo no por mustra cu bo tin bo rijbewijs cu bo, nan ta detene Bo y kita e auto fo’i Bo. Ningun hende no ta para responsabel.
Hopi biaha tambe por mira e autonan cu ta wordo getakel, debi cu nan no tin nan seguro paga. Hopi biaha ta corda automobilistanan pa tin nan papelnan na ordo. Esaki ta pa e propio siguridad di e chauffeur. Si un otro auto bin dal den bo y no tin su papelnan, e consecuencia ta p’abo, pa mira con bo ta haya bo auto paga.
Tendencia di celular
Tin puntonan strategico cu no ta na unda e polisnan ta para, ta wak si e chauffeur tin telefon den man. Nan ta para luganan cu abo no ta wak y unda nan por avisa di antemano esnan para mas dilanti, cua ta e auto cu e persona cu tin telefon den man.
Control ta sigui
Esaki ta un proyecto di polis di bario di Oranjestad cu e controlnan ta keda te cu diabierna anochi. Por bay establecimentonan tambe. E no ta precisamente control den trafico. Pa loke ta e chauffeurnan, percura pa bo tin bo rijbewijs valido y bo papelnan di auto na ordo y esnan cu ta actua contra ley, bo ta adverti cu polis por bin actua riba bo.
Ta conseha e comerciantenan tambe, percura pa nan tin nan papelnan na ordo.
Un proyecto di polis di bario
Door cu esaki ta un proyecto di polis di bario, a sinta pensa kico tur nan lo por controla den e districto di Playa. Ora a keda cla, a presenta e proyecto aki na superiornan y a duna green light, pa por haya suficiente polis pa e controlnan aki tuma luga. Awe diaranson, a cuminsa for di 6’or di mainta y no sa te ki ora e lo stop. E controlnan por sigui anochi, Rasmijn a comenta.
