Awe mainta ta tumando luga findishi di un cantidad di auto y boto, cu autoridad a kita for di hende relaciona cu un of otro crimen. E organisacion Afpakteam, den cual tin Polis, Duana, DIMP y entidadnan hudicial Hulandes, a organisa un benta di un cantidad di boto y autonan cu a tuma den beslag debi na nan procedencia. Pero, por lo menos un di e botonan no tabata na benta mas awe, despues cu a kim’e den marduga.
Ken a kim’e ainda no ta conoci pero dado momento a nota cu tabatin candela den cura di Garage Cordia. Ora a activa Polis y Bombero, a resulta cu tabatin un boto na candela. Ta e boto peñero “Spanish Fly” cu tabata para den cura, cla pa bende awe mainta na esun cu paga mas pe. A kim’e specialmente na e parti patras, den cual e motornan y e part patras di e boto a subri daño di candela. E deurwaarder a dicidi e ora pa cancela e subasta di e boto specifico aki awe.
Mester menciona cu e boto encuestion lo tabata e “hot seller” awe, pasobra ta un boto conoci y cu ta ideal pa keiro y pa pisca, si ta esey ta e motibo pakico ta cumpr’e. Polis awor ta investiga ken ta esun cu a kima e boto, cu awor aki ta propiedad di husticia. Tur placa recauda cu benta di e botonan y autonan aki ta bay den fondo pa combati criminalidad mes.
