David Abdul miho conoci como “Appie” no ta un desconoci den mundo di futbol. David a inicia cu futbol na Aruba, como hungado di S.V. R.C.A. y S.V. Estrella. Despues di esaki a hunga profesional pa 6 aña na Sparta Rotterdam.
Despues di su carera profesional a regresa Aruba pa bay den un mundo di entrenamento. David a coach S.V. Estrella y S.V. Dakota, unda a logra diferente titulo hunto. Un logro grandi sigur den su carera di coach ta titulando campeon cu S.V. Dakota despues di 23 aña.
David Abdul a inicia su carera cu Arubaanse Voetbal Bond na januari 2020, fungiendo como Assistant Academy Coordinator y despues di 6 luna a nombr’e como Academy Coordinator di AVB. David sigur a traha duro hunto cu coachnan di academia y por nota diferente logro cu academianan a bin ta presenta den ultimo tempo den compromisonan internacional, sigur contribuyendo na un miho futbol riba veld.
Despues di 2 aña, AVB a anuncia e grato noticia cu ta nombra un Arubiano como Technical & Development Manager di AVB.
Su meta ta pa desaroya futbol y duna muchanan oportunidad pa saca lo maximo di nan carera futbolistico y tambe brinda ayudo pa desaroya clubnan y pa hiba e futbol di Aruba mas na halto, trahando hunto cu directiva, staf di AVB pero tambe clubnan pa asina nos por hiba Aruba su futbol na un nivel mas halto.
