Den fin di siman un grupo di diesshete ex-marinier a bini hunto despues di 40 aña. Esaki ta prome bes cu algo asina a pasa y cu nan a haya un rondleiding pa mira e cambionan den Marinierskazerne Savaneta.
Na maart 1983 e grupo aki, di 21 hoben, a drenta den Marinierskazerne obligatoriamente y nan tabata conoci como peloton 83-1. Na entrada caba e grupo aki tabata sumamente contento di por a reuni bek despues di 40 aña. No tur tabata presente, pasobra tres di nan ta biba den exterior y uno a fayece, di cual e ex-mariniernan aki hunto cu nan guia a tuma un minuut di silencio pa record’e.
Despues cu nan a haya splicacion y a pasa e proceso pa drenta Marinierskazerne, e rondleiding a cuminsa. Tur a expresa cu Marinierskazerne a cambia completo y e unico edificio cu ainda t’ey ta e kapel. Nan tabata contento y orguyoso di a haya e oportunidad como e prome peloton di por a tene un recorido den Marinierskazerne.
Ricardo Janga, ex-marinier, a expresa cu a dura ocho luna pa por a prepara p’e dia importante pa nan. “E no tabata facil, pasobra tabatin hopi cos cu mester a haci”, el a expresa orguyoso. Aunke cu no tur tabata presente, asina mes a pasa un momento agradabel. Tempo cu nan a forma parti di marinier, esaki tabata obligatorio. Pero despues di Status Aparte cos a cambia y a bira esun cu kier boluntariamente forma parti di marinier. El a gradici Corporal Tromp cu a dedica algun ora na nan pa duna splicacion dje cambionan, tambe Defensa Hulandes como comandante di Marinierskazerne.
Pa Jeffrey Schuilenburg, ex-marinier, e momento cu el a crusa e porta di Marinierskazerne ta e mesun sentimento di 40 aña pasa. E orguyo di por a forma parti di Marinierskazerne. “Mi ta contento di ta bek. Pero mas cu claro mi ta asombra cu e cambionan”, el a expresa. “Loke por a mira t’ey ainda ta e ‘brotherhood.’ E ta manera 40 aña pasa.” Tur a keda un aña so, pero tabatin diferente anecdota.
Corporal Tromp tabata contento y orguyoso di por a conduci e rondleiding cu peloton 83. “E ta algo bon pa topa cu un peloton cu tabata prome cu nos. Cera conoci cu otro peloton.” Di scucha e storia nan, tabata algo unico pa su persona. Cu bishita di peloton 83-1, Corporal Tromp ta spera cu asina aki mas peloton lo yega Marinierskazerne y asina ey e hobennan por scucha con e tabata antes.
Pa mas lesa TREMPAN.COM.
