Tabata alrededor di 2:00 am ora cu e habitantenan di Washington a bati alarma p’un zonido fuerte, despues di e impacto tur luz a paga na nan cas. Ora a sali pafo, a topa cu un auto marca Toyota modelo Altezza pega den boshi waya di coriente un palo di luz kibra den dos pida.
No a basila y a bati alarma mesora na polis. E chauffeur a logra saca e auto y trot bay for di e sitio, lagando basta daño atras. Ora polis a yega, den e area cerca di CMB Noord, a top’e auto, e chauffeur a sali fo’i auto y core bay na pia.
Polis a cuminsa persigui e chauffeur na pia. No mucho leu a logra deten’e e chauffeur di e Altezza aki. E accidente aki a trece cu ne cu varios parti di Noord a keda sin coriente, Gasparito, Bubali, Sasakiweg y Palm Beach.
Na final personal di Elmar a presenta pa atende cu e palo di luz mientras cu polis a transporta e homber pa warda di polis caminda lo present’e dilanti un subfiscal. A confisca e auto y a hib’e pa ward’i Balashi, caminda e proceso di investigacion lo sigui.
