Durante e siman cu a caba aki a laga e dos ultimo sospechosonan liber, cu tabata cera den KIA den e caso Wanglo, conoci den pueblo como Vacuna Gate. Eyden Landsrecherche a investiga esunnan cu a cobra pa duna prueba di vacuna falso. Di e forma ey tin hende a burla di e ley cu tabata obliga ciudadanonan pa vacuna pa por biaha of pa por traha na un luga specifico.
E prome sospechoso pa a sali liber di siman pasa caba tabata Jonathan Ridderstap. Husticia no a mira motibo pa manten’e cera mas den KIA. Y despues di dje, e siman aki a laga Maikel Koolman y Charisa Bislip den libertad pendiente e caso. Ta sinti cu nan rol lo no ta dje esencial den e caso y cu nan lo no haya mas castigo di prizon di locual nan a sinta caba e ultimo simannan. Si lo detene mas hende den e caso no ta conoci, aunke cu mayoria di e declaracionnan a bay den un solo direccion. Ta un solo persona tabata responsabel pa e proyecto aki, cu tabata duna acceso y cu tabata na altura di tur locual ta sosode.
E caso a cuminsa cana
E caso a cuminsa cana ora cu a tuma nota cu comprobante di vacunacion tabata sali for di e sucursal di DVG na aeropuerto, anto na orarionan cu nan no ta operacional. Ey luz cora a cende den e dashboard na DVG y a entrega keho mesora na Landsrecherche. En bes cu a kit’e for di trabou pa motibo di investigacion, a mand’e bay traha den call-center na DVG. Casi por sinti cu a purba protege. Eyden ta bisa cu e ta prima di e hefe grandi, Yuri Feliciano, pues por mir’e tambe como “friends & family”. Pa e relato completo lesa TREMPAN.
