Durante manifestacion cu a tuma luga diaranson atardi a sosode tambe un caso lamentabel di destruccion y vandalismo na e cas di pueblo, esta Parlamento di Aruba.
Por a tuma nota cu e sosten cada biaha ta menos na e grupo di Richi Danies cu tin aproximadamente casi 3 luna staciona (drumiendo) na edificio di Gobernador riba Plaza Henny Eman riba L.G.Smith Blvrd. pa asina demostra su malcontento riba e problematica di abuso di mucha.
Mientras manifestacion tabata andando, a surgi un incidente caminda polis a duna instruccion pa kita un di e pamfletanan cu tabatin na sitio. Cu esaki a bin resistencia pero tambe destruccion na edificio di parlamento. A kibra varios bentana!
Na sitio a tuma nota mesora cu dos persona femenino a sali na careda direccion Plaza Padu. A cuminsa un persecucion tanto na pia como e demas unidadnan policial riba caya. Rapidamente a logra detene un di e sospechosonan na skina di e edificio di Censo, dilanti bushalte chikito.
E persona aki a resisti su detencion formalmente. Polis a pone na tera y boei e mientras a pidi transporte di CEA pa hib’e warda. No e keda falta e grito y insultonan den direccion di cuerpo policial, tambe na momento di hinc’e den e vehiculo di transporte a pasa basta dificultad pa logra haci esaki.
