Gobierno ta aumenta e BAZV. Hasta a bisa pa por duna mihor servicio den cuido medico. Loke gobierno no a bisa tabata cu nan mesun landsbijdrage lo wordo cancela. Di otro banda a constata cu AZV a debolbe un suma di placa na gobierno, pasobra AZV a gasta menos di loke a destina na AZV a base di BAZV.
Mientras tanto ta bin un aumento atrobe. Riba esaki Anko Ringeling a splica cu berdad na 2017, como cu e gastonan cu a presupuesta, por a controla e gastonan mas miho y como cu gobierno na final di 2017, pa medio di un presupuesto supletorio a aumenta e landsbijdrage. A resulta pa aña 2017, cu AZV a keda cu un positief saldo. E positief saldo ey, cual ta alrededor di 30 miyon, cu tabata algo unico den henter e historia di AZV, e no ta asina cu tabata tin e blanco riba banco. E ta un suma administrativo. E suma ey, e saldo positivo ey, a papia cu gobierno, directie financien entre otro y a pone pa mira con lo haci cu esey. Mester ta conciente cu entre otro tin cierto vordering ainda riba gobierno di deficitnan den e aña anterior. E ta asina tambe cu tin un verrekening cu a haci cu gobierno, pasobra ta ehecutando pa gobierno, pa e ambtenaarnan, e asina yama AZV plus. E gastonan ey gobierno mester paga tambe. Tur esey a haci cu e resultado positivo cu tabata tin pa 2017 di rond di 30 miyon, por a verrekening algun debe cu gobierno tabata tin cu AZV ainda cu na final a resulta na un saldo di rond di 10 pa 15 miyon florin.
E suma ey, gobierno ta duna pa cada aña coriente, ta haya mensualmente e BAZV, ta haya e prima y ta haya un voorschot riba e landsbijdrage. Pa aña 2018, e landsbijdrage ta hopi abao. Mas tanto ta bay depende na 2018 riba e BAZV y e prima. Esey ta e cos importante pa 2018. Den esey, den e prome lunanan di 2017 no ta spera hopi landsbijdrage pero e ora ey mester haya si e BAZV y e prima. Esey tin overleg awor aki cu directie financien, pa haya e placa ey mas regularmente, pa asina por cubri gastonan.
E resultado positivo cu tabata tin na 2017, a uz’e pa verreken cu gobierno pa cancela cierto debenan cu gobierno tabata tin ainda cu AZV. Hecho ta cu tabata tin un resultado positivo. Pero esey ta incidental como cu por ehempel na fin di 2017, gobierno a subi e landsbijdrage, cu a haci cu a haya mas entrada. No por bisa como cu tabata tin un resultado positivo na 2017, cu pa 2018 e BAZV eigenlijk no tabata necesario. E aumento di BAZV, ta mir’e den su contexto di 2018. Na 2018 tin cierto gastonan atrobe presupuesta. Mester di entrada atrobe. Entrada un biaha mas, ta bin for di prima, BAZV y landsbijdrage. Si gobierno kier baha e landsbijdrage, e tin cu subi un di e otro dosnan. Sea e prima of e BAZV y nan a scoge pa subi e BAZV. Consecuentemente e landsbijdrage ta bahando. Esey ta mirando e situacion di 2018.
