Diamars a tuma luga e sorteo di Mini Mega Plus di Lotto pa Deporte. Tur diamars y diabierna ta hunga e wega di Mini Mega di cual esun esaki tabata na 650 mil florin y cu dos florin mas, esta Mega Plus, esaki tabata na un total di 925 mil florin.
Tin un ganado p’e premio grandi aki. El a cumpr’e na Lucky Number situa den Wilhelminastraat. Esun cu a gana e Mini Mega a cumpr’e sin Mega Plus. E numbernan ganado ta 20-24-28-30 y Mega Ball ta 14.
Premio gordo pa aña 2023
Mester menciona cu pa Mini Mega Plus tabatin un premio miyonario dia 3 di februari 2023, ora cu nan a gana e jackpot na Afl. 2.775.000,=. Ta un premio cu a crece desde aña 2023 pero cu a crusa e aña nobo cu e jackpot creciendo. Na november e di dos premio miyonario di Mini Mega tabata Afl. 1.250.000 y a cay den Dakota!
Premionan miyonario den 2022
Na aña 2022 Lotto di Aruba a cambia bida di no menos cu dos famia. E prome tabata dia 5 di april 2022 ora cu a gana e premio di Mini Mega Plus na Afl. 1.125.000,=. No a dura cuater luna, cu atrobe a haci un famia miyonario, cu tabata dia 2 di augustus 2022, ora cu e premio a yega Afl. 3.300.000,=. E tempo ey a “cambia bida” di Fichi y Glenda Tromp y famia.
Na aña 2022 e premionan di Lotto 5 no a surpasa e nivel miyonario, sino esun di mas halto tabata dia 7 di september 2022, ora cu a gan’e na Afl. 800.000,=.
Na aña 2022 Lotto di Aruba a paga no menos cu 28 miyon florin na premio!
Premionan miyonario den 2021
Den aña 2021, Lotto di Aruba a paga no menos di tres premio miyonario na e pueblo di Aruba. E prome tabata dia 12 di januari 2021 ora e Mini Mega Plus a alcansa Afl. 1.825.000,=. E di dos premio grandi tabata e sorteo di Mini Mega Plus di dia 20 di april 2021, cu e bunita premio di Afl. 1.125.000,=.
Y e ultimo premio miyonario di Mini Mega Plus den 2021 tabata di dia 3 di december 2021 ora cu a gana e jackpot di Afl. 1.800.000,=. Riba e dia ey, un grupo di shete colega cu ta traha na Centraal Bureau voor de Statistiek a pone placa hunto y combina nan fecha di nacemento pa asina cera e numbernan ganado. Ta algo cu nan ta haci pa algun aña caba y su siguiente dialuna nan a acudi hunto na oficina di Lotto pa cobra e premio di 1 miyon y 800 mil florin. Richard Werleman a cobra e premio na su nomber ya cu ta un solo persona por haci esaki. Asina e coleganan a parti e premio entre nan. Segun calculacion, cada un a haya 257 mil florin.
Mester menciona cu un solo biaha tabatin un premio miyonario pa e sorteo di Lotto 5 y pa como tabata un premio record tambe. Tabata dia 9 di october 2021 ora cu a gana e jackpot di Lotto 5 pa un total di Afl. 2.000.000,=. Nunca prome e premio di Lotto 5 a yega asina halto.
Lotto ta haci hopi hende miyonario
Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior. Na aña 2018 e benta a cay un poco na 48 miyon florin y a baha mas ainda na 2019 y yega te na 45 miyon florin. Na aña 2020, durante pleno pandemia y ceramento trempan di oficinanan di catochi, a bende 39 miyon florin. Na aña 2021 e bentanan a subi y yega 53 miyon florin. Na aña 2022, benta di Lotto di Aruba a alcansa un record historico, un benta nunca bisto di 56 miyon florin.
Record di Lotto di Aruba
Mester menciona cu e premio record di Lotto 5 keto bay ta esun di dia 10 di mei 2023, esta e bunita premio di Afl. 2.200.000,= cu nan a gana na Lucky Numbers den Arendstraat. E record di Mini Mega Plus tabata di dia 27 di juni 2017, ora cu un solo hungado a gana e premio grandi di Afl. 3.700.000,=.
Tocante Lotto pa Deporte
Lotto, e loteria di Aruba ta existi desde 1982 y tin diferente wega; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. E fundacion a sa di crece benta di e productonan durante e ultimo añanan te alcansa un record na 2022 di 56 miyon florin! Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
